تورکمانەیل داوا کەن تەلەعفەر و دووزخورماتوو بوونە دوو پارێزگا
شەفەق نيوز/ محمد سەمعان سەروک بەرەی تورکمانی عراقی، ئمڕوو سێشەممە، داوا کرد قەزای تەلەعفەر و قەزای دووزخورماتوو بکریەنە دوو پارێزگا، و دووپات کرد کە ئی داواکارییە تەوەریگ سەرەکیە لە بەرنامەی سیاسی لیست بەرەی تورکمانی عراقی.
یەیش لە وەختیگ تیەیک کە دەوڵەت عراق روی وەرەو قایمکردن نامەرکەزی ئیداری و فراوانکردنی دەسەڵات پارێزگایایل کەێد، و دویای ئەوە کە قەزای هەڵەبجە بویە پارێزگای نوویگ، وەگورەی سەمعان کە دووپات لەبان گرنگی جیوەجیکردن گامەیلیگ هاوشیەوە کرد کە دادپەروەری و یەکسانی ناوەین گشت پیکاتەیل گەل عراق نشان بەید، وە بی هویچ دووچەوەکی یا پەراویزخستن.
سەمعان لە بەیاننامەیگ رەسیە ئاژانس شەفەق نیوز داوا لە حکومەت عراق و ئەنجومەن نوێنەرەیل کرد قەزایەیل تەلەعفەر و دووزخورماتوو بکریەنە دوو پارێزگای نوو، هەکاتی هەڵەبجە، و لە بنەمای ئەو قوربانیەیل گەورە کە تورکمان لە نواگیریکردن تیرۆر پبشکەش کردگە، و خوەیڕاگرییان لەڕوی سیاسەتەیل پەراویزخستن و دویرخستن ئەرا دەیان ساڵ، و رکداری هەمیشەییان لەبان یەکێتی و سەروەری عراق.
وتیش: ئی پەڵپە تەوەریگ سەرەکیە ئەرا بەرنامەی سیاسی لیست بەرەی تورکمانی عراقی، و ئامانجیگ هاوبەشە ئەرا هیز و لایەنە سیمایەیل تورکمانی، لە باوەڕ ئیمە کە دووزخورماتوو و تەلەعفەر شایستەی خوەیان وەپییان بیریەید جویر گامیگ وەرەو لاوردن ستەم میژووی لەبان ئی دوو قەزا، و وەجیهاوردن گەشەپیدان دادپەروەرانە و وەردەوام لەناویان.
سەمعان داوا لە گشت چینەیل سیاسی نیشتمانی، و نوێنەرەیل گەل لە پەرلەمان کرد وەگەرد ئی ماف دەستووریە بووسیەن، ئەرا قایمکردن بنەمایل دادپەروەری و هاوڵاتیەتی، و مسۆگەرکردن هاوسەنگی نیشتمانی لە کیشان نەخشەی ئیداری و سیاسی عراق.
دویەکە دووشەممە، ئەنجومەن نوێنەرەیل عراق، دەنگ لەبان وەپارێزگاکردن هەڵەبجە دا، تا بوودە پارێزگای شمارە 19 لە عراق، ئەوەیش دویای چەن ساڵیگ لە دویاخستن هاوردنی وەفەرمی لە پەرلەمان عراق لەوەر ناکۆکی سیاسی.
لەی باوەتە، نێچیروان بارزانی سەرۆک هەرێم کوردستان ئافەرین لە دەنگدان لەبان وەپارێزگاکردن هەڵەبجە جویر پارێزگای نوویگ کرد، و دووپات کرد کە بەغداد رەنجەیل هەرێم کوردستان لە دەنگدان ئەرا شارەگە تەواو کرد.
