بەغداد.. ئازاردان مناڵیگ تا مردن وەلایەن باوگ و باوەژنی

شەفەق نیوز/  سەرچەوەیگ لە پۆلیس عراق، ئمڕوو چوارشەممە، خەوەردا لە مردن دویەت مناڵیگ پەنج ساڵان لە ئەنجام ئەزیەتداین تونیگ وەلایەن باوگی و باوەژنی لە خوەرهەڵات بەغدای پایتەخت.

سەرچەوەگە وە ئاژانس شەفەق نیوز وت، زانیاری رەسیە وەلایەن یەکەیگ لە هاوکارەیل لە حالەتیگ کوشتن مناڵیگ لە ئەنجام تونوتیژی خێزانی لەناوچەی کویچەی مونتەزەر لە خوەرهەڵات بەغداد.

وتیش؛ مناڵەگە ناوی  (م، م) لەداڵگبوی 2020، لە ئەنجام شکەنجەدان گیان لەدەسداس، لەدویای ئەنجامدان لێکۆڵینەوە وەلایەن پسپۆر بەڵگە تاوانەیل.

وەپای سەرچەوەگە، لەقێ تەرمەگە شوین ئەشکەنجە و گەزین و کەوەوبوین لەبان لەشی بویە.

دیاریکرد، لەدویای لێکۆڵینەوە وەلایەن ئەفسەر بنکەگە باوگ مناڵەگە و ژنە دویەمەگەی دەسگیرکریان، دان وەبان ئەوەگ دانانە خوەیان کوشتنەسێ لە ئەنجام تونوتیژی.