بارستە وایگ مامناوەن خوەڵوتووز وەگەرد خوەی تیارێد و کەشوهەوای باکوور عراق هوونکەو کەێد
شەفەق نیوز ـ بەغداد
کەشناس سادق عەتیە، ئمڕوو سێشەممە، راگەیان بارستە وایگ مامناوەن لە دویۆە دووشەممەو وەرەو خوەرئاوا و باکوورخوەرئاوا هاتیە بویەسە مدوو داوەزیان فرەیگ پلەی گەرمی وە مدوو گرجەوبوین شەپوولەیل خوەڵوارین، وەشیوەی زیاتر دویزەوکردیە لە ناوچەی باکوور خوەرئاوای وڵات.
عەتیە وە ئاژانس شەفەق نیوز وت " فرەیگ لە شارەیل وڵاتەگە کاریگەربوون وەی کەشە، باوجی وە پلەی کەمتر لە باکوور خوەرئاوا، شەپوول خوەڵوارین خەسیگ تا ئیوارەی ئمڕوو لە کەشوهەوای شارەیل باکوور وڵات بوود وە مدوو وا، کە کاریگەری لەبان ناوچە کویەیلە دروسکەێد".
وتیش، " لە شوینە جیاوازەیل خوەلوتوز بەرزەوبوود وە پلەی ناوڕاس تا سووک مەزەنەکرێد تا شەو ئەرا ناوچەیل ترەک دزە بەێد".
دیاریکرد، "سوو چوارشەممە، وا جیگیرەوبوود لەناوچەیل باکوور خوەرئاوا، بڕیگ لە شارەل باشوور وڵات و باشوور نەینەوا لە وەخت نیمەڕوو چالاکی تەپوتوز بەرزەوبوود، وەگەرد شەو ئارامەوبوود".
لەباوەت پلەی گەرمی عەتیە دووپاتکرد "کەمیگ داوەزیان وەخوەی دوینێد هیلێد کەشەگە لە باکوور وڵات مامناوەن بوود، هەمیش پلەی گەرمی لە ناوڕاس و باشوور داەزیان وەخوەی دوینێد".
