ئاسایش عراق مناڵیگ رفیای لەلای بازرگان "ئەندامەیل ئایەم" ئازادکەێد
شەفەق نیوز/ سەرچەوەیگ ئەمنی، ئمڕوو سێشەممە، خەوەردا لە ئازادکردن مناڵیگ خوار 12 ساڵ لەدویای چەن ساعەتیگ لە رفاننی وە لایەن باندیگ بازرگانیکردن وەئەندامەیل ئایەم، لە پارێزگای موسەنا باشوور عراق.
سەرچەوەگە وە ئاژانس شەفەق نیوز وت "هێزە ئەمنیەیل سەر وە ئاسایش نیشتیمانی، شەوەکی ئمڕوو توەنستن مناڵیگ خوار 12 ساڵ ئازادبکەن، لەدویای رفاننی لە نزیک ماڵیان لە کویچەی عەسکەری لە ناوڕاس سەماوە".
وتیش، "باندیگ بازرگانیکردن وەئەندامەیل ئایەم مناڵەگە رفاننە، لەدویای ئەوەگ لە کامیرەیل چەودێری رووشنبوی".
لە بەغداد، سەرچەوەیگ ئەمنی وە ئاژانسەگە وت، هێزەیل ئەمنی لەرێ دانان کوڵەی قایمیگ گەنجیگ لەداڵگبوی 1997 دەسگیرکردن کە تەقەلای چزدان خانمە فەرمانبەریگ دایە لە شار پزیشکی لەدویای ئەوەگ هەڕەشەی بڵاوکردن وینەیلی داگە لەبان تووڕەیل کۆمەڵایەتی، لەناوچەی کازمیە دەسگیرکریا".
