98 کوشیان لە ئەنجام لافاوەیلیگ له ویلایەت ئاسام هیندی

شەفەق نیوز- نیودەلهی

شمارەی قوربانیەیل لافاوەیل لە ویلایەت ئاسام هیندی، ئمڕوو شەممە، بەرزەو بۊ ئەرا 98 کوشیاگ، لە وەختیگ شمارەی زەرەدمەنەیل رەسیە نزیکەی 155 هەزار کەس لە 13 ناوچە، وەپای ئەوەگ ئاژانس هەواڵەیل "پرێس ترەست ئۆف ئیندیا"ی هیندی خەوەر دا، لە بڵاوکريايیگ فەرمی کە دەسەی وەڕێوەبردن کارەساتەیل لە ویلایەتەگە دەریکردیە.

 بڵاوکريايەگە وت، دۊایین مردنەیل کە خەوەر لەلیان دریا لە فەرمانگەی داهاتەیل ماهمورا لە کەرت تشاریدیۆ لە ویلایەتەگە بۊ، کە 13 ناوچە وە ئاو لافاوەیل زەرەدمەن بۊنە، کە یەیش کاریگەری خستە بان 464 ئاوای.

بڕ گشتی زەرەدمەنەیل رەسیە 155849 کەس، و ناوچەی جولاجات فرەترین زەرەد وەپی رەسی، کە 58750 کەس زەرەدمەن بۊن، ئیجا  سیفاساجار 48286 کەس و جورهات 25259 کەس.

 پەنجشەممەی گوزەشتە، لەوەر  لافاوەیل زیاتر لە 168 هەزار کەس لە 15 ناوچە زەرەدمەن بۊن، کە لافاوەیل بۊنە مدوو ژیرئاوکەفتن رووبەریگ کشاوەرزی وە قەوارەی نزیکەی 10748 هێکتار، لە وەختیگ فرەتر لە 47 هەزار ئاژەڵ زەرەدمەن بۊن.

دیاری کریەێد کە وڵاتەیل باشوور ئاسیا ساڵانە، لە ناوەین هەردوو مانگ یۆنیۆ (حوزەیران) و سێپتەمبەر (ئەیلول)، وەرز وارانە وەرزیەیل وەخوەیانەو دۊنن کە بوودە مدوو لافاوەیل و کارەساتە سروشتییە فراوانەیل، وە تایبەت لە هیندستان و پاکستان.