وەرگری تورکیا: بەرزەوبوین ئامار کوشیاگەیل ئەشکەوت کوردستان ئەرا 8 سەرباز
2025-07-07T06:43:37+00:00
شەفەق نيوز – ئەنقەرە
وەزارەت وەرگری تورکیا، ئمڕوو دووشەممە، وت: ئامار رویداو ژەهراوبوین سەربازەیل تورک بەرزەو بوی ئەرا هەشت کوشیاگ، ئەوەیش دویای هەڵمژین گاز میسان مەوقەی وەشکین ئەشکەفتیگ لە هەرێم کوردستان.
وەزارەتەگە لە بەیاننامەیگ وت: رویداوەگە دویەکە یەکشەممە بویە، مەوقەی جیوەجیکردن ئەرک پەیاکردن تەرم سەربازیگ تورک لە ئۆپراسیۆنیگ سەربازی وەگەرد پەکەکە کوشیاس.
وتیش: 11 سەرباز ترەک ئەرا خەسەخانە بریان کە گازەگە هەڵمژینە.
دویەکە یەکشەممە، وەزارەت وەرگری تورکیا کوشیان پەنج سەرباز راگەیان، ئەوەیش دویای تویشهاتنیان وە ژەهر میسا لەناو ئەشکەفتیگ لە هەرێم کوردستان عراق، مەوقەی جیوەجیکردن ئەرک مینەکردن و وەشکین.
