وازەوبوینیگ لە هورمز.. رێککەفتن ئیرانی-عومانی چەوەڕیکریاگ و رێڕەو دەریایی وەختانە

شەفەق نیوز- وەدۊاچگن

وەرپرسیگ ئەمریکی وەدەسهاوردن وەرەونواچگن لە گفتوگۆیل ناوەین ئیران و سوڵتاننشین عومان راگەیان، لەناو تەقەلایەیلیگ لە واشنتن ئەرا کووتاییهاوردن وە جەنگ سەربازی وەگەرد تاران و گلەوداین جۊلەی دەریایی ئەرا گەرووەگە.

 ئاژانس "رۆیتەرز" لە وەرپرسە ئەمریکیەگە وت کە ویلایەتە یەکگرتگەیل ئەو گەمارۆ کە چەسپانیەسە بان بەندەرەیل ئیرانی دەسوەجێ هەڵگرێد دۊای راگەیانن رێککەفتنیگ و دەسکردن جۊلەی بارهەڵگری بازرگانی وە بی ریگری، و دیاری کرد کە رێکارە ئەمریکیەیل بەسیاگ مینن وە ئاست پابەندبۊن ئیران وە بڕگەیل رێککەفتنەگە.

 وەپای وەرپرسەیل ئەمریکی کە قسە ئەرا تووڕ "ئەی بی سی" کردنە، رێککەفتن چەوەڕیکریاگ ناوەین ئیران و سوڵتاننشین عومان دیاریکریاگ بوود وە 60 رووژ، کە لەناوی کار کریەێد ئەرا رەسین وە رێککەفتنیگ دریژماوە کە وازکردن گەروو هورمز وە تەواوی مسۆگەر کەێد، لەپاڵ وەردەوامبۊن گفتوگۆیەیل لەباوەت دۆسیەی ئەتۆمی ئیرانی.

 هەڵوێست ئەمریکی وەپای وەرپرسەیل، زوور خەێدە بان مسۆگەرکردن ئازادی دەریایی لەڕی گەرووەگە وە بی چەسپانن باج لەبان ئەو کەشتیەیلە کە رەد بوون یا پابەندکردنیان وە وەدەسهاوردن رازیبۊن وەرجەوەخت ئیرانی ئەرا رەدبۊن.

 لەی باوەتەو، رووژنامەی "وۆل ستریت جۆرناڵ" دیاری کرد کە رەشنویس رێککەفتنەگە دروسکردن رێڕەویگ دەریایی وەختانە ئەرا ئەو کەشتیەیلە کە تیەن لە نزیک لای ئیرانی، و یەکیگ ترەک ئەرا ئەو کەشتیەیلە کە دەرچن لە نزیک سەڵتەنەی عومان لەخوەی گرێد.

 رووژنامەگە لە وەرپرسیگ ئەمریکی وت کە واشنتۆن رازی نیەوود ئیران باج رەدبۊن وەپای رێککەفتنەگە وەدەس بارێد، یا ماف نەهیشتن هیچ لایەنیگ لە وەکارهاوردن گەرووەگە بگرێدە دەس، و دیاری کرد کە رێڕەوەیل دەریایی پێشنیارکریاگ وەختانە بوون.

لە وەرانوەر ئەوە، رووژنامەگە لە وەرپرسەیل لە ناوچەگە وتیە کە رێککەفتن پێشنیارکریاگ شایەت رۆڵیگ وەردەوام بیەێدە ئیران لە وەڕێوەبردن گەروو هورمز، وە ئەوەگ ئی وژاردە "خاسترین وەدەسهاوردنە" لەی رەوشەیل ئیسە.

هەرلیوا تووڕ "فۆکس نیوز" لە وەزیر وەرگری ئەمریکی وەرین مارک ئیسپەر وت کە ئی رێکخستن پێشنیارکریاگە رۆڵ دەێدە ئیران و عومان لە وەڕێوەبردن جۊلەی رەدبۊن لەناو گەرووەگە، و هۊشداریدا کە ئەوە هاتێ بوودە مدوو "ئەنجامیگ فرە بەد" ئەرا ویلایەتە یەکگرتگەیل.