هاتێ شمارەگە بەرزەو بوود... لە رویداوەیل ساحل سوریا هەزار و ٣٨٣ هاوڵاتی مەدەنی کوشیانە
شەفەق نیوز/ روانگەی سوری ئەرە ماف مرۆڤ، ئمڕوو چوارشەممە، راگەیان کە هەزار و ٣٨٣ هاوڵاتی مەدەنی لە ئەنجام ئەو پەلامارەیلە لە ناوچەی ساحل لە خوەرئاوای سوریا کوشیانە وتیش: شمارەی کوشیاگەیل وەردەوامە لە بەرزەوبوین چوینکە “وە بەڵگەنامەکردن شمارەی کوشیاگەیل هیمان وەردەوامە”.
ڕوانگەگە وتیش: “لەلای کەمەو هەزار و 383 هاوڵاتی مەدەنی کوشیانە کە فرەیان عەلەوی بوین، ئەوەیش لە ئەنجام ئەو تونوتیژیەیلە کە تا 6 ئازار لە ناوچەی ساحل لە خوەرئاوای سوریا رویدا”.
وەگورەی ڕوانگە، "ئەوانە لەلایەن هیزە ئەمنییەیل و گروپەیل شانوەشانیان کوشیانە"، ئاشکرا کرد کە ئی ئۆپەراسیۆنانە لە ٧ و ٨ ئازار خەسەو بوی.
ئەحمەد شەراع، سەرۆک سوریا راگەیان کە کوشتن وەکۆمەڵ ئەندامەیل تایفەی عەلەوی، هەڕەشە وەبان ئەرکەگەی ئەرا یەکخستن وڵاتەگەی دروس کەێد، و پەیمان دا سزای ئەوانەگ وەرپرسیارن بەێد ئەگەر هاوپەیمانەگانیشی بوینە.
شەرع وتیش: سوریا دەوڵەتیگ یاساییە، یاسا ڕێڕەوی خوەی وەرد گشت لاییگ بەێد، ئیمە جەنگ کردیمن ئەرا وەرگریکردن لە ستەمدیدەیل و رازی نییمن هەر خوینیگ وە ناڕەوا بڕشێد و یا بی سزا و پرسیارکردن رەد بوود، ئەگەر کەسیگ لە ئیمەیش بویە.
