یەمەن.. كەفتن کوشیانیگ وە پەلامار هیزەیل حکومی وەبان گردەوبۊن حووسیەیل
شەفەق نیوز- سەنعا
هیزەیل سەر وە حکومەت یەمەنی، ئمڕوو چوارشەممە، راگەیان لە ئامانجگردن گردەوبۊنەیل گرووپ ئەنسارولڵای "حووسیەیل" لە خوەراوای شار قەعتەبە لە باکوور پارێزگای زالع.
میدیایەیل راگەیانن عەرەبی، لە هیزەیل چەکدار سەر وە حکومەت یەمەنی وتن کە پەلامارەگە وە فرۆکەیل بیفڕۆکەوان جیوەجی کریاس، و بۊەسە مدوو کوشیان شمارەیگ لە حووسیەیل، وە بی دیاریکردن شمارەیان.
میدیایەیل راگەیانن وتنیش کە هیزەیل حکومی چوار فرۆکەی بیفڕۆکەوان سەر وە حووسیەیل لە باکوور مەئریب خستنەسە خوارەو.
وەگەرد یەیش، میدیایەیل راگەیانن سەر وە حووسیەیل، خەوەردان لە پالاماریگ تووپخانەیی لەلایەن هیزەیل سعودی، نیمەڕۊ ئمڕوو، کە ئامانج شمارەیگ لە ناوچەیل لە وەڕێوەبەرایەتی زاهر سنووری گردگە، وە بی هۊردەکارییگ زیاتر.
حووسیەیل وەردەوامن لە ئامانجگردن هیزەیل حکومی یەمەنی، وەگەرد پەلامارەیل لەبان کەشتیەیل بازرگانی و هەڵگرەیل نەفت لە دەریای سوور لەلای گەروو باب ئەلمەندەب، کە دۊاترینیان دۊکە سێشەممە بۊ، کە پاسەوان کەناراوەیل یەمەنی کوشیان شەش کەس و زەخمداربۊن دە کەس ترەک وە پەلاماریگ راگەیان کە کەشتییگ بازرگانی لە باب ئەلمەندەب کردە ئامانج.
