ئیمارات راگەیان کە کەشتییگی لە هورمز کریاسە ئامانج و توومەت "چەتەیی" خەێدە بان سوپای پاسداران
شەفەق نیوز- ئەبوزەبی
ئاژانس خەوەری ئیمارات، ئمڕوو شەممە، خەوەردا لە وەئامانجکریان کەشتییگ سەر وە کۆمپانیای نەفت ئەبوزەبی نیشتمانی "ئەدنۆک" وە مووشەکیگ لە وەخت رەدبۊنی لە گەروو هورمز.
ئاژانسەگە هیچ هۊردەکارییگ زیاتر لەباوەت جۊر ئامانجکردنەگە یا ئەو زەرەدەیلە کە رەسیەسە کەشتیەگە دیاری نەکرد، لە وەختیگ ئەو لایەنە دیاری نەکرد کە لەپشت تەقانن مووشەکە، وەلی دووپات کرد کە رۊداوەگە وە بی زەرەدەیل گیانییە.
رۊداوەگە لە سای بەرزەوبوین گرژیە ئەمنییەیل لە ناوچەی کەنداو و گەروو هورمز تیەێد، کە رێڕەویگ سەرەکییە ئەرا جۊلەی بارهەڵگری نەفت و وزەی جەهانی.
لە لای خوەییش، وەزارەت دەیشت ئیمارات، ئمڕوو شەممە، "وە سەختترین دەسەواژەیل" ئامانجکردن کەشتییگ بارهەڵگر سەر وە ئەدنۆک وە مووشەکیگ لە وەخت رەدبۊنی لە گەرووەگە شەرمەزار کرد، و دیاری کرد کە "ئامانجکردن جۊلەی دەریایی و وەکارهاوردن هورمز چۊ ئامرازیگ ئەرا فشار یا چزداین، وە کارەیل چەتەیی لەلایەن سوپای پاسداران هەژمار کریەێد".
سوپای پاسداران ئیرانی، ئمڕوو شەممە، وازکردن گەروو هورمز بەسا وە رازیبۊن ویلایەتە یەکگرتگەیل وە مەرجەیل ئیران و دەسکیشانی لە دەسوەردان لە رێڕەو گفتوگۆیل هەرێمی، وەپای ئەوەگ ئاژانس "تەسنیم" ئیرانی، لە قسەکەر وەناو سوپای پاسداران عەمید سەردار موحیبی بڵاوی کرد.
یەیش لە وەختیگ تیەێد کە وەرپرسیگ ئەمریکی، راگەیان لە وەدەسهاوردن وەرەونواچگن لە گفتوگۆیل ناوەین ئیران و عومان، لەناو تەقەلایەیلیگ لە واشنتۆن ئەرا کووتاییهاوردن وە جەنگ سەربازی وەگەرد تاران و گلەوداین جۊلەی دەریایی ئەرا گەرووەگە.
