لە سوریا.. هەر ساعەتیگ ئاشکرای کوشتاریگ کریەێد

شەفەق نیوز/ رامی عەبدولڕەحمان وەڕیەوبەر روانگەی ماف مرۆڤ سوریا، ئمڕوو شەممە، ئاشکرای بەرزەوبوین شمارەی کوشیاگەیل لە کەناراوەیل سوریا کرد کە رەسیە 340 کەس لە تایفەی عەلەوی، وەگەرد وەردەوامی توومارکردن، کە هاتێ شمارەگە ئەرا زیاتر لە 1000 کوشیای بەرزەو بکەێد.

عەبدولڕەحمان وتیش: کارەیل کوشتن هیمان وەردەوامە، دووپات کرد کە هەر سەعاتیگ کوشتار نوویگ ئاشکرا کەیمن لە کناراوەیل سوریا، کە قوربانیەیل وە تەقەکردن لەلایەن گرووپەیل چەکدار کەفتنە کە ئەرا ناوچەگە هاوریانە.

  وەگورەی ئەو شمارەیلە کە ڕوانگەگە تووماریان کرد، لە شار بانیاس 60 مەدەنی کوشیاس، لەناویان 10 ژن و5 مناڵ، و لە ئاوای تویمە 31 کەس کوشیاس، لەناویان 9 مناڵ، و لە ناوچەیلیگ ترەک جویر سنەوبەر لە ریف جبلە قوربانی لە ژن و مناڵ کەفتنە.

عەبدولڕەحمان وتیش: هیمان ژاوەژاو ئەمنی لە ناوچەگە مەنیە، هەرچەن وە فەرمی کۆتایی یاخیبوین سەربازی راگەیانن کە بەشیگ لە ئەندامەیل سوپای رژیم وەرین سوریا رانینەی.

دووپاتیش لە گرنگی وسانن کارەیل تونەڕەوی لە ناوچەگە کرد، کە وت: رژیم بەشار ئەسەد ئەرا وسانن کوشتن گەل سوریا رمانیمن، نەک تا فیتنە لەناویان دروس بکەیمن، و داوای جویلەکردن ناودەوڵەتی زوییگ کرد ئەرا وسانن کوشتار و وەجیهاوردن ئارامی لە کناراوەیل سوری.

شەفەق ئمڕوو شەممە، وەزارەت وەرگری سوریار راگەیان کە شکست وە پەلامار لایەنگرەیل رژیم وەرین لەبان بارەگای فەرماندەیی هیزەیل دەریاوانی لە شار لادقیە هاورد.

ئەوەیش دویای وتاریگ لەلایەن ئەحمەد شەرع سەرۆک سوریا هات کە هەڕەشە لە لایەنگرەیل رژیم رمیاگ دا، کە کەفنە ژیر وەشوینکەفتن و سزا ئەگەر خوەیان و چەکیان وەدەس نەیەن.