لەبان جەنگ ئۆکرانیا.. دانوسەنین ئەمریکا و رووسیا لە ریاز دەسوەپی کەێد
شەفەق نیوز/ کاروەدەسەیل ئەمریکا و رووسیا وە وەزیرەیل دەیشت دوو وڵات، ئمڕوو سێشەممە، لە ریاز پایتەخت سعودیە، وە ئامانج کۆتاییهاوردن وە جەنگ ئۆکرانیا دەسکردنە دانوسەنین.
وەگورەی ئاژانس فرانس پرێس، لە گرتە تەلەفزیۆنییەیل دەرکەفتگە، شازادە فەیسەڵ بن فەرحان، وەزیر دەیشت سعودیە و موساعید بن محمد ئەلعیبان، سڵاکار ئاسایش نیشتمانی سعودیە، لە بان مێزیگ نیشتنە کە بەشداربویەیل لە دەوری نیشتوێن.
لە لایەن ئەمریکییەو مارکۆ ڕوبیو وەزیر دەیشت و مایک والتز سڵاکار ئاسایش نیشتمانی و ستیڤ ویتکۆف کلکریای تایبەت ترەمپ لە خوەرهەڵات ناوڕاس ئامادەبوین.
لە لایەن رووسیاو سێرگی لاڤرۆڤ وەزیر دەیشت و یوری ئوشاکۆڤ سڵاکار دیپلۆماسی کرێملین بەشداری کردن.
دانوسەنین لەبان رەسین وە لەیەکفامستنیگ وەڕیەو چوود کە بوودە مدوو کۆتاییهاوردن وە جەنگ لە ئۆکرانیا، ئامانجیگە کە دۆناڵد ترەمپ سەرۆک ئەمریکا هەمیشە راگەیانیە کە توانای وەجیهاوردنی دیرێد مەوقەی بانگەشەی هەڵوژاردن، بیجگە لە کەمکردن گرژییەیل پەیوەندییەیل ناوەین هەردوگ وڵات.
ئاژانس فرانس پرێس لە زار سەرچەوەیگ وە قسەی خوەی "دانوسەنکار"ە، کە مۆسکۆ "چەوەڕی پیشکەفتن کەێد لە لایەن ئابووریی دانوسەنین وەرد ئەمریکییەیل لە ماوەی دوو سێ مانگ".
دانوسەنین لە کۆشک درعیە لە باکوور خوەرئاوای ریاز وەڕیەو چوود، ئەوە یەکەم گفتوگۆە لەی ئاستە لە ناوەین هەردوگلا لە دویای لەشکرکیشی رووسیا وەبان ئۆکرانیا لە ٢٤ شوبات ٢٠٢٢.
وەزارەت دەیشت سعودیە بەیاننامەیگ بڵاوکردە و لەناوی راگەیان کە “وە رینمایی” شازادەی جینشین محمد بن سەلمان، “شانشین سعودیە لە شار ریاز، میوانداری دانوسەنین ناوەین فیدراسیۆن رووسیا و ئەمریکا کەێد، یەیش جویر بەشیگ لە تەقەلایل شانشینی سعودیە ئەرا بەرزکردن ئاسایش و ئاشتی لە جیهان”.
