فرەیان مناڵ و ژنن.. 370 هەزار ئاوارە لە سوریا لەدویای نوەوبوین جەنگ
2024-12-07T08:57:03+00:00
شەفەق نیوز/ وڵاتە یەکگرتگەیل راگەیان، 370 هەزار کەس وەلای کەمەو ئاوارەبوینە لە وەخت جەنگە کۆتایەیل مانگ وەرەین.
قسەکەر وڵاتە یەکگرتگەیل ستیفان دوجاریک لە کۆنگرەیگ رووژنامەوانی لە نیویۆرک راگەیان "فرەیگ لە ئاوارەیل لە ژن و مناڵ پێکتێن" دیاریکرد دەیان هەزار کەس ئەرا باکوور خوەرهەڵات سوریا چگنە.
دوجاریک وتیش، وەگەرد رەسین وەرز زمسان و داوەزیان پلەی گەرمی مەردم لەبان جادەیل یا لەناو ماشینەیلیان خەفن.
وڵاتە یەکگرتگەیل دیاریکرد فرەیگ لە پەناگەیل رەسینەس ئەرا بان توانای خوەیان.
جەنگەگە هەمیش زەرەد وە ژێرخان زندگی رەسانییە دەسمیەتی پێویستەیل پەکخستیە.
