غەززە.. 80 کوشیاگ لە ماوەی 24 ساعەت و شمارەی قوربانیەیل لە 57 هەزار رەد کەێد
شەفەق نيوز – غەززە
وەزارەت تەندروسی لە کەرت غەززە، ئمڕوو یەکشەممە، راگەیان کە ئامار گورزەیل ئیسرائیل وەبان کەرت غەززە لە ماوەی 24 ساعەت گوزەشتە رەسیە 80 کوشیان و304 زەخمدار.
وەزارەتەگە لە بەیاننامەیگ وت: شمارەی قوربانیەیل پەلامارەیل وەردەوام ئیسرائیل لە 7 تشرین 2023ەو بەرزەو بوی ئەرا 57,418 کوشیان و136,261 زەخمدار.
هەرلیوا، سەرچەوەیگ پزشکی لە خەسەخانەی مەعمدانی خەوەردا لە کوشیان دوو کەس و بڕیگ زەخمدار لە ئەنجام گورز ئیسرائیل وەبان گەڕەک توفاح خوەرهەڵات کەرت غەززە.
سەرچەوەیگیش لە خەسەخانەی شیفا وت: تەرم پیاییگ لەژیر رمیاگەیل دویای گورز ئیسرائیل وەبان ماڵیگ لە گەڕەک شێخ رەزوان خوەرئاوای شار غەززە دراوریا.
لە باشوور غەززە، خەسەخانەی ناسر خەوەردا کە پەنج کە لە ئەنجام گورزیگ وەبان چادر ئاوارەیل خوەرئاوای خان یونس کوشیان، و چوار کەسیش - سێ مناڵ ها ناویان - وە گورزیگ وەبان چادر ئاوارەیل لە خود ناوچەگە کوشیان.
