سێیەم شەپوول گورزەیل ئیسرائیل وەبان تەهران و زەخمداری سەختیگ عەلی شەمخانی
شەفەق نيوز/ شەوەکی ئمڕوو جمعە، ئیسرائیل سێیەم پەلاماری وە گورزەیل ئاسمانی وەبان ئیران جیوەجی کرد، لە چوارچیوەی ئۆپراسیۆن سەربازی بیوینەیگ وەبان دامەزراوەیل ئەتۆمی و سەربازی ناسک، وەگەرد راگەیانن زەخمداری عەلی شەمخانی، سڵاکار عەلی خامەنەئی ریبەر ئیران، و بردنی ئەرا خەسەخانە وە زەخمەیل سەختیگ.
شەمخانی لە دیارترین کەسایەتیەیل ئەمنیە لەناو رژیم ئیران، وەرژەیە لە پۆست سکرتێر ئەنجومەن باڵای ئاسایش نەتەوەیی بوی، کە لە کەسە فرە نزیکەیل خامەنەئیە.
وەگورەی میدیایل راگەیانن ئیران، ئەو گورزەیلە مە رەسینە تەهران پایتەخت و شارەیلیگ ترەک، بوینە مدوو شمارەیگ لە گەورە فەرماندەیل سەربازی، و زانایەیل ئەتۆمی ئیرانی، لە گەورەترین پەلامار وەبان ژیرخانەیل سەرکردایەتی رژیم.
لەناو ئەو سەرکردەیلە کە کوشیانیان راگەیانن، لیوا حسێن سەلامی فەرماندەی گشتی سوپای پاسداران ئیرانر لە پەلامار ئاسمانی ئیسرائیل وەبان بارەگای گشتی سوپای پاسداران لە تەهران.
تەهران هەمیش کوشیان ژەنەڕال غولام عەلی رەشید، و دوو زانای ئەتۆمی ناودیار فەرەیدون عەباسی، محمد مەهدی تەهرانچی راگەیان، وەگەرد پەلاماردان شوین ئەحمەدی رەوشەن لەناو دامەزراو ئەتۆمی نەتنز.
تەلەڤزیۆن ئیران خەوەردا کە شوین سەرەکی دروسکردن ئۆرانیۆم لە نەتنز کەفتە وەر چەن پەلاماریگ، لە خود وەختەگە دیاری کرد کە هویچ پیسبوین ئەتۆمی ئاشکرا نەکریاس.
پەلامارەیل ئیسرائیل رەسینە شارەیل تەبریز و کرماشانر لە نشانەیگ ئەرا فراوانبوین شوینەیل ئەو ئۆپراسیۆن سەربازیە.
لە سای ئی جەنگە، دەسەڵاتەیل ئیران بەسانن ئاسمان وڵات تا بانگوازیگ ترەک راگەیان، لە وەختیگ وەردەوامە لە وەکارخستن ئەوپەڕ ئامادەباشی لە دامەزراوە گرنگەیل.
وەرانوەر ئەوە، ئاژانسی رۆیتەرز لە زوان سەرچەوەیگ ئەمنی ئیرانی وت: تەهران پلان دانەێد ئەرا وەڵام زیانداریگ وەبان پەلامار ئیسرائیل.
لە لایەن ئیسرائیل، وەرپرسیگ باڵا ئەرا تووڕ فۆکس نیوز وت: پەلامارەیل ئیمە وەبان ئیران تەنیا سەرتاس، لە دەسنیشانکردنیگ ئەرا ئەوە کە هەڵمەت نوویگ لە شوین ئی پەلامارەیلە هەس.
