سەرۆک ئۆپۆزسیۆن تورکیا لەڕوی ئەردۆگان وسێد: وە بیدەنگ لەبان دەسگیرکردن ئیمام ئۆغڵو نیەوسیمن

شەفەق نيوز/ ئۆزغور ئوزێل سەرۆک حزب کۆماری ئۆپۆزسیۆن لە تورکیا، ئمڕوو دووشەممە، دووپات لە وەردەوامی ناڕەزایەیل پشتگیریکردن ئەکرەم ئیمام ئۆغڵو سەرۆک شارەوانی ئیستەنبوڵ کرد، و دووارە داوای رێکخستن هەڵوژاردن پەرلەمان و سەرۆکایەتی وەرجەوەختە کرد.

 ئوزێل لە کۆنگرەیگ جیاواز حزبەگەی وەژیر ناونیشان (ئیرادە ئەرا نەتەوە) لە پەیامیگ ئەرا حکومەت تورکیا وت: ئەگەر ئازایی دیرین ئەرا هەڵوژاردن وەرجەوەختە تیەێن.

 هەمیش وت؛ هاتێ مەوقەی هەڵوژاردن بکەفێدە تشرین دویەم ئایندە، وتیش: ئیمە لەڕوی ئیوە وسیمن، ئەوەسا جاریگ ترەک تورکیا رزگار کەیمن.

 وەرجەیە، ئۆزێل باس نیاز حزبەگەی کرد لە دەسکردن وە هەڵمەتیگ فراوان وە داوای دادکاریکردن ئیمام ئۆغڵو وەبی بەندیکردنی، وەگەرد گاڵداین ئەرا جیوەجیکردن هەڵوژاردن وەرجەوەختە لە نزیکترین وەخت.

 لە چەوپیکەفتنیگ رووژنامەوانی وەرد رووژنامەی ئۆپۆزسیۆن "سوزجو" سەرۆک حزب کۆماری وت: ئامانجیان لە هەڵوژاردن هاتگ وەدەسهاوردن خود ئەو شمارەی دەنگەیلەسە کە لە هەڵوژاردن دویایی کەفتنە دەس رەجەب تەییب ئەردۆگان کە رەسیە نزیکەی 27 ملیۆن دەنگ.