سوپای ميانمار دویەتیگ لە تەمەن 6 ساڵان وە توومەت کوشتن ژەنەڕاڵیگ خانەنشین دەسگیر کەێد
شەفەق نيوز/ رووژنامەیگ سەروە ئەنجومەن سەربازی لە ميانمار، ئمڕوو جمعە، خەوەردا کە سوپا دویەتیگ لە تەمەن شەس ساڵان دەسگیر کرد، لەناو گرووپیگ وە تیرۆرست دادەی قەڵەم، لەبان کوشتن ئەفسەریگ خانەنشین لە سوپا لە مانگ گوزەشتە.
چۆ هتون ئۆنگ تەمەن 68 ساڵە، کە ئەفسەر بوی وە پلەی بريجادير ژەنەڕاڵ کە هەمیش باڵیۆز بوی، لە یانگون پایتەخت بازرگانی میانمار لە رووژ 22 ئایار گوزەشتە کوشیا، لە یەکیگ لە زاقترین کارەیل تیرۆرکردن لەو وڵاتە کە جەنگ ناوخوەیی وەخوەی دوینێد.
رووژنامەی "گلوبال نيو لايت ئۆف ميانمار"، وت " 16 تاوانکار، 13 نیر و سێ ما دەسگیر کریان".
لە وینەیلیگ وەرد خەوەرە رووژنامەگە، وینەی ئەو دویەتە لە تەمەن شەش ساڵان بڵاو کردگە، کە وە دویەت بکوشەگە ناسیا.
روخسار ئەو دویەتە لە چاپەیل ئەلیکترۆنی رووژنامەگە کە ئاژانس رۆیتەرز دیەی شاریاوێدەو، وەلێ لە پۆستەیلیگ ترەک لەلایەن دەسەڵاتەیل ئەنجومەن سەربازی لەبان سۆشیال میدیا دیار بوی، لە وەختیگ قسەکەر ئەنجومەن سەربازی لەبان داواکارییەیل کۆمێنت نەهاتە دەنگ.
گرووپ یاخیبوی "جەنگاوەرەیل دووڵ تەڵایی" دژوە ئەنجومەن سەربازی لە بەیاننامەیگ رووژ 22 ئایار وت؛ ئەو ژەنەڕاڵە کوشتیە لەبان پشتگیریکردن وەردەوامی ئەرا ئۆپراسیۆنەیل سەربازی، وەتایبەت پەلامارەیل وەبان مەدەنیەیل.
