سوریا: هیزەیل ئیسرائیل چنە ناو چەن ناوچەیگ لە ریف درعا
شەفەق نیوز - سوریا
میدیایەیل سوریا، ئمڕوو جمعە، راگەیان کە هیزەیل ئیسرائیل دزە کردنە وەرەو ناو چەن شوینیگ لە حەوز یەرموک لە ئاوایەیل پارێزگای درعا لە باشوور سوریا.
تەلەفزیۆن سوریا بڵاویکرد کە "شەش ماشین هیزەیل ئیسرائیل چینەسە ناو ئاوای سەیسون لە حەوز یەرموک لە هوەرئاوای درعا".
لای خوەیەو ماڵپەڕ خەوەری سوریا "گردەوبوین ئەحرار حۆران" بڵاو کرد کە "هیزەیل ئیسرائیل کە سێ ماشین بوین، چینەسە ناو کۆمپانیایگ سەربازی وەرین سەروە لیوای 112ی هیزەیل رژیم وڵریم، کە کەفێدە جەرگەی ئاوای عەین دەکار لە حەوز یەرموک".
دووپاتیش کرد کە "دەسدرویژی هیزەیل ئیسرائیل وەبان ئەو شوینە کە وەرجەیە باسی کردیمن، دویەم جارە لە دویای رمیان رژیم بەشار ئەسەد. وەرجەیە چگەسە ناو کۆمپانیا سەربازییەگە و ئۆپەراسیۆن ماڵین و وە بولدۆزەر ئەنجامداگە".
وەگورەی ڕاپۆرتەگە، هیزەیل ئیسرائیل سێ هاوڵاتی سووری دویای چەن ساعەتیگ لە دەسگیرکردنیان لە 2 تەمموز لە کێڵگەی ئەلبەسالی باشوور قونەیترە ئازاد کردنە، وەقسەی تەلەفزیۆن سوریا.
هیزیگ سوپای ئیسرائیل، رووژ چوارشەممەی گوزەشتە چگنە ناو کێڵگەیگ لە ئاوایەیل قونەیترەی باشوور و سێ هاووڵاتی دەسگیر کردن، تەلئەبیب بانگەشەی ئەوە کرد کە پەیوەندییان وە ئیرانەو بویە.
لە ٢٨ حوزەیران هیزیگ سوپای ئیسرائیل چگە ناو ئاوای روەیحینە لە باشوور قونەیترە و لەورت ماڵەیلیان وەشکێد.
تووڕ خەوەری ناوخۆیی درعا ٢٤ بڵاویکر کە هیزیگ ئیسرائیلی کە لە دوو تانک و دوو ماشین بوین، چگنە ناو ناوچەگە و چون ماڵیگ وەشکیە.
پەلامارەیل ئیسرائیل وەبان سوریا لە دویای رمیان رژیم ئەسەد وە شیوەیگ وەرچەو زیایەو بویە و شوینە سەربازییەیل سوپای سوریا کردیەسە ئامانج ئەرا لەناوبردنیان و ریگریکردن لە خاسەوکردن ژیرخاننیان.
