ریبەر رووحی دورزیەیل وەردەوامبوین جەنگ وەرد سوپای سوریا راگەینێد
شەفەق نيوز- دیمەشق
شێخ ئەبو سەلمان حکومەت هیجری ریبەر رووحی دورزیەیل لە سوریا، ئمڕوو چوارشەممە، وەردەوامبوین جەنگ وەرد سوپای سوریا راگەیان، و هیچ دانوسەنینیگ یا رێککەفتنیگ پەسەن نەکرد.
هجری لە بەیاننامەیگ رەسیە ئاژانس شەفەق نیوز وت: سڵاو لە گیان پاڵەوانی و کەرامەت ئیوە کەیمن، و داوا لەلیدان کەیمن وەردەوام بوین لە نواگیریکردن چەتەیل تیرۆر تاوانکار، کە هاتنە تا باوانمان لەناو بیەن و هەسیمان بنبڕ بکەن، کە ناشرینترین ناوانەیل لە کوشتن و دزیکردن و تاڵانکردن جیوەجی کردن، و ماڵ و خەسەخانە و پەرستگایەیل وەبی ئاین و ویژدان سزانن، وەبی جیاوازیکردن ناوەین بویچگ و گەورە، یا ناوەین پیاو و ژن.
وتیش: ئیمە لە سەرۆکایەتی رووحی، دووپات لە گرنگی وەردەوامبوین لە وەرگری شەرعی و وەردەوامبوین جەنگ کەیمن تا ئازاکردن گشت خاک پارێزگامان لە چەتەیلە وەبی هیچ مەرجیگ، و ئەوە وە ئەرک نیشتمانی و مرۆیی و رەوشتی دانەیمن کە خەمسەردی لەناوی نییە.
وتیش: داوا لەوانە کەیمن کە لەی چەتەیلە مونیەسەو چەن خوەیان فڕە بیەن و خوەیان بیەنە دەس گەنجەیل پاڵەوانمان، و دووپات لە گەنجەیلمان کەیمن هەرکەسیگ چەک خوەی دادە دەس کەفێدە قەرەی ئیمە، سووکایەتی وەپی نەکریەێد، کە یەیش لە داوان و رەوشت ئیمە نییە کە لەبانی گەورە بویمنە، و وەرانوەر باتڵ جویر خوەیان نیەکەیمن، وەلێ وە چەسپیان حەق و دادپەروەری لەیەو بەرزەو بویمن.
دووپاتیش کرد کە ئەرا رای گشتی ناوخوەیی و ناودەوڵەتی دووپات کەیمن کە هیچ رێککەفتنیگ یا دانوسەنینیگ وەرد ئی چەتەیلە نییە کە وە دروو ناو خوەی وە حکومەت نەێد، و هوشداری دەیمن لە هەر کەسیگ یا لایەنیگ لای هەڵوێستە دەرچوود، یا پەیوەندی بکەێد یا رێککەفتن یەکلایەنی بکەێد، ئەوە خوەی خەێدە سزای یاسایی و کۆمەڵایەتی وەبی وەخشین یا خەمسەردی.
