ئەرا یەکەمین جار.. شاندیگ لە حکومەت تاڵیبان سەردان ژاپۆن کەێد

شەفەق نیوز/ حیگر وەزیر ئابووری ئەفغانستان، لەتیف نیزاری، ئمڕوو دووشەممە، راگەیان کە حکومەت تاڵیبان ئەوەسا ئمڕوو ئەرا یەکەمین جار سەرمان ژاپۆن کەێد، لە وەختیگ هیمان تاڵیبان تەقەلای دانوەپیدان ناودەوڵەتی کەێد دویای گلەوخواردنی ئەرا دەسەڵات وەرجە سێ ساڵ و نیم. 

شاندەگە رووژ شەممە لە کابوڵ دەرچگ لە سەردانیگ یەک هەفتە وەپی چوود، و نوێنەرەیل وەزارەتەیل دەیشت و ئابووری و خوەنەواری باڵا هاناوی.

لەتیف نیزاری لەبان ئێکس نویسان: تەقەلا دەیمن پەیوەندی وەرد جەهان بکەیمن ئەرا ئەفغانستانیگ هازدار و یەکخریای و گەشەدار ە پیشکەفتگ و تا بویمنە ئەندامیگ چالاک لە خیزان ناودەوڵەتی.  

تەلەڤزیۆن گشتی ژاپۆن "ئێن ئەچ كای"، لە زوان سەرچەوەیل دیبلۆماسی ئەفغانی وت: وەرپرسەیل ئەفغان ئەوەسا لەی سەردانە نووڕینەیل خوەیان وەرد وەرپرسەیل لە حکومەت ژاپۆن ئویشن.

 وەزارەت دەیشت ژاپۆن دویای پەیوەندیکردن ئاژانس فرانس پرێس رازی نەوی لێدوانیگ بەێد. 

حکومەت بزووتنەوەی تاڵیبان هەمیشە شاندەیل ئەرا ئاسیای ناوڕاس و رووسیا و چین کلکەێد، وەلێ وەرجەیە شاندیگ ئەرا ژاپۆن کلنەکردیە.

لە ئەوروپایش، سەردان فەرمی نەویە، مەگەر ئەرا نەرویج لە لویتکەیل دیبلۆماسی لە 2022 و2023.

باڵیۆزخانەی ژاپۆن لە کابوڵ وە شیوەیگ وەختانە خریا قەتەر دویای رمیان ئەو حکومەتە کە لە خیزان ناودەوڵەتی پشتگیری کریاوێد وە دەس بزووتنەوەی تاڵیبان لە ئاب 2021.

لەو وەختەو، کۆمەڵگای ناودەوڵەتی دووارە چالاکیەیل دیبلۆماسی و مرۆیی لە ئەفغانستان گلەو دان، کە یەکیگ لە لاتترین دەوڵەتەیل جەهانە، کە 85 % لە خەڵک ئەو وڵاتە کە شمارەیان رەسێدە 45 کەس، رووژانە تەنیا یەک دۆلار کەفێدە بەش تاکە کەسیگیان، وەگورەی نەتەوە یەکگرتگەیل.