ئیران وە فەرمی چوودە ناو بڕین بەرنامەڕکریاگ کارەبا
شەفەق نیوز- تەهران
وەڕێوەبەر کۆمپانیای نیشتمانی کارەبای "توانیر" ئیرانی، محەمەد ئیلاهداد راگەیان، وڵاتەگەی ناچار بوود لە ئمڕوو یەکشەممەوە وەربەس لەبان دابینکردن کارەبا بنەێد، وە مدوو بارودۆخ نائاسایی پەیوەنیدار وە دابینکردن سزەمەنی ئەرا وێستگەیل بەرهەمهاوردن وزە.
ئیلاهداد لە لێدوانەیلیگ ئەرا تەلەفزیۆن فەرمی وت: ماوەی بڕینەیل وە شیوەی یەکجاری دیاری نەکریاگە، باوجی هاتێ بڕین کارەبا لە هاوبەشەیل ماڵان و بازرگانی ئەرا ماوەی دوو ساعەت هەر دوو رووژ جاریگ، یا وە ئەوپەڕی دوو ساعەت رووژانە بگرێدەو.
وتیش؛ دابینکردن سزەمەنی ئەرا وێستگەیل کارەبا لە ماوەی مانگەیل ئایندە سەختتر بوود وە بەراورد وەگەرد ساڵ گوزەشتە، و دیاری کرد، ئەو زەرەدەیلە کە لە جەنگەو کەفتنەسەو بوینەسە مدوو لەدەسداین نزیکەی 230 ملیۆن مەتر سێجا لە توان بەرهەمهاوردن گاز وڵاتەگە.
ئاشکراکرد، ئیران تۊیەنستگە بەشیگ لەو زەرەدەیلە قەرەبوو بکەێدەو، باوجی توانای بەرهەمهاوردن گاز هیمان کەمترە لە ئاستەیل ساڵ گوزەشتەس، کە ئەوەیش سەختی دابینکردن سزەمەنی هەوەجە ئەرا وێستگەیل بەرهەمهاوردن زیاتر کەێد.
ئیلاهداد وتیش؛ وەختەیل بڕین کارەبا لە ڕێ ئەپڵیکەیشن "کارەباگەم" ، و ئەپڵیکەیشن "بەڵێ" ، یا لە ڕێ کوڵەنامەیل نامە (SMS) ئەرا هاوبەشەیل راگەیەنرێد.
وەرجە ئیسەیش دەسەڵاتدارەیل ئیران لە ساڵەیل دۊیایی رێکارەیل هاوشیوە لە سای کەمی سزەمەنی لە وێستگەیل راگەیانوین.