ئیران ئەرا "تەندروسی جیهانی" باس پەلامارەیل ئیسرائیل وەبان بنکەیل پزشکی کەێد
شەفەق نيوز – تەهران
جەعفەر میعادفەر سەرۆک دەزگای فریاکەفتن ئیران، ئمڕوو شەممە، راگەیان کە وڵاتەگەی وە ریڕەوەیل یاسایی و ناودەوڵەتی کەفێدە شوین تاوانەیل ئیسرائیل لە ئەنجام پەلامارەیل ئی دویاییە کە رەسینە دامەزراوەیل پزشکی.
میعادفەر لە قسەسلیگ کە میدیایەیل فەرمی بڵاوی کردن وت: یەکیگ لە بنکەیل فریاکەفتن لە وڵاتەگە کەفتە وەر ویرانکاری تەواویگ، هەرچەن دامەزراوەیگ مەدەنی و هیچ شیوەیگ سەربازی لەناوی نییە، دووپاتیش کرد کە 11 ماشین فریاکەفتن وە شیوەی گەورەیگ لەو پەلامارەیلە زەردمەن بوین.
وتیش: وڵاتەگەی لەلای ریخریاگ تەندروسی جیهانی باس ئەو دەسدرویژیەیلە کرد، لە چوارچیوەی تەقەلایەیل سزادان ئیسرائیل لەبان ئەو دەسدرویژیەیلە وەبان ژیرخانەیل تەندروسی.
لە 13ی حوزەیران گوزەشتە، ئیسرائیل ئۆپراسیۆنیگ ئاسمانی ناکاوی وەبان سەربازگەیل و دامەزراوەیل ئەتۆمیی و مەدەنی لە ئیران جیوەجی کرد، بوینە مدوو کوشیان شمارەیگ لە زانایەیل و سەرکردەیل سەربازیە ناودیارەیل ئیران.
ئێرانیش وە مووشەک و فرۆکەیل بێفڕۆکەوان وەڵام ئە. پەلامارەیلە دا، کە رەسینە شار و دامەزراوەیل ئیسرائیل.
