ئیران ئامادەباشی لە 46 دامەزراوەی گرنگ بەرزەو کەێد لە ئەگەر هەر ئامانجگردنیگ
شەفەق نیوز- تاران
وەرگری شارستانی ئیرانی، رووژ چوارشەممە، راگەیان بەرزەوکردن ئامادەباشی لە 46 دامەزراوە لە ئەگەر ئامانجگردن ژیرخان.
وەپەی بەیاننامەیگی، بەرزەوکردن ئامادەباشییەگە پاڵاوگەیل نەفت و وێستگەیل کارەبا و بەندەرەیل و پیەڵەیل و فڕۆکەخانەیل لەخوەی گرێد.
وەرپرسیگ ئاگادار لەبان گفتوگۆیەیل ئەمریکی ئیرانی، شەوەکی ئمڕوو، دووپات کرد کە تاران وەڵامیگ ئەمریکی لەبان پیشنیارەی ئەرا کووتاییهاوردن وە جەنگەگە وەرگردگە.
ئاژانس "رۆیتەرز"، لە زوان وەرپرسەگە وت کە وەزیر دەیشت ئیرانی عەباس عراقچی دیداریگ وەرد ناوبژیوانەیل قەتەری لە دەوحە ئیوارەی دۊکە سێشەممە ئەنجام دا و وەڵام وڵاتە یەکگرتگەیل لەبان پلانیگ پیشنیارکریاگ ئەرا دروسکردن متمانە ماوەی هەفت رووژ وەرگرد کە ئمڕوو چوارشەممە لە تاران باسی کەێد.
وەرپرسەگە وتیش کە ناکۆکی سەرەکی پەیوەندی وە زنجیرەی گامەیل پلانەگە دیرێد، کە ئامانج لەلی دروسکردن متمانە و گلەوخواردن ئەرا چاپیگ پۊتەوکریاگ لە یادداشت لەیەکفامستن کە وڵاتە یەکگرتگەیل و ئیران لە یۆنیۆ/ حوزەیران واژووی کردنە.
پلانە ئیرانییەگە، کە دریژە کیشێد ئەرا ماوەی هەفت رووژ، دووپات لەبان وسانن گشت کارەیل جەنگی لە ئیران و لوبنان کەێد، لەشان ئازادکردن سامانە سڕکریاگەیل ئیرانی کە وە ملیارەها دۆلار مەزەنە کریەێد، و لاوردن ئەو سزایەیلە کە چەسپیانەسە بان نەفت ئیرانی، و کووتاییهاوردن وە گەمارۆی ئەمریکی لەبان بەندەرەیل ئیرانی.
وەپەی پلانەگە، تاران دۊای ئەوە ری دەێد وە وازکردن گەروو هورمز لە وەرانوەر دەریاوانی، لەبان ئەوەگ هەردگ لایەنەگە گفتوگۆیەیل لەباوەت پرۆگرام ناوەکی ئیرانی دەس وەپی بکەنەو.
