خامەنەئی نەعیم قاسم کەێدە نوینەر خوەی لە لوبنان

خامەنەئی نەعیم قاسم کەێدە نوینەر خوەی لە لوبنان
2025-02-05T08:34:31+00:00

شەفەق نیوز/ عەلی خامەنەئی ریبەر باڵای ئیران، بڕیاریگ دەرکردن وە دامەزرانن نەعیم قاسم ئەمیندار گشتی حزبولڵا، جویر نوینەر خوەی لە لوبنان، وەگورەی ئاژانس خەوەری تەسنیم.

وەرجەیە، حەسەن نەسرولڵا ریبەر وەرین حزبولڵا، نوینەر ریبەر باڵای ئیران بوی لە لوبنان.

جی باسە کە حزبولڵا قاسم وە ئەمیندار گشتی دانا، دویای دەیان ساڵ لەسای نەسرولڵا، و جیگری بوی لە حزبەگە، و یەکیگ لە دامەزرەیلی بوی، وەلێ لەو ناوەیلە نەوی کە چەوەڕی بکریەێد بوودە ئەمیندار گشتی. 

وەلێ کوشتن هاشم سەفیەدین وەلایەن ئیسرائیل، کوڕ میمگ نەسڕوڵڵا، کە چەوەڕی کریایوێد ئەو لە شوینی بنیشێد، وە گورزەیلی وەبان ناوچەی مریجە لە زاحیەی باشوور بەیروت، وەگەرد چەن ناوەیل دیاریگ ترەک، دیارە تەنیا نەعیم قاسم ئەرا ئی پۆستە هیشتەو.  

ئەو پیاوە لە تەمەن 71 ساڵە، زوان فەرەنسی و ئینگلیزی زانێد، و خوەنەواری باڵا دیرێد لە کیمیا، وەگەرد خوەنەواری ئاینی لەژیر دەس گەورە زانایەیل شیعە لە لوبنان. 

هەمیش ئەرا چەن ساڵیگ کار مامووستایی کرد لە کیمیا.

وەگەرد ئەوەیش، ئەو سەرکردەی ریشچەرمگە، ئەرکەیل وەڕیەوبردن کاروبار حکومەتی لە لوبنان وەدەسیەو بوی، لە چەودیاریکردن کار وەزیر و پەرلەمانتارەیل حزبەگە، بیجگە کاروبار شارەوانی و سەندیکایل، کە دەمار سەرەکی حزبولڵا بوی لە دامودەزگایل فەرمی. 

 

Shafaq Live
Shafaq Live