"حووسیەیل": واشینتۆن لە ئازار گوزەشتەەو هەزار گورز وەبان یەمەن وەشانیە

شەفەق نيوز/  گرووپ ئەنساروڵا (حووسی) لە یەمەن، ئمڕوو سێشەممە، توومەتبار ئەمریکا کرد وە جیوەجیکردن نزیکەی هەزار گورز ئاسمانی لەبان زەویەیل یەمەن، لە ١٥ی ئازار گوزەشتەەو تا ئیسە، و دووپات لە کەفتن دەیان قوربانی لە مەدەنیەیل کرد و ویرانکاری فراوانیگ لە ژیرخانەیل.

وەگورەی سایت "26 سیپتەمبەر" کە وەناو ئەو گرووپە قسە کەێد، جەماڵ عامر وەزیر دەیشت لە حکومەت حووسی پەیام ئەرا چەن دەزگایگ نەتەوەیی کلکرد، لەلییان سکرتێر گشتی نەتەوە یەکگرتگەیل و سەرۆک ئەنجومەن ئاسایش و ماف مرۆڤ، لەناوی داوای دروسکردن دەسەیگ ناودەوڵەتی سەروەخوەیی کرد، ئەرا لێکۆڵینەوە لە "تاوانەیل جەنگ ئەمریکی".

عامر وتیش: ئەو گورزەیلە شوینەیلیگ ژیانی مەدەنی کردنە ئامانج، جویر فڕۆکەخانەیل و بەندەرەیل ە بووسانەیل و خەسەخانەیل و ئەمارەیل ئاو وەگەرد شوینەیل ئاسەواری، وتیش؛ بەندەر راس ئەلعیسا لەناو ئەو ئامانجەیلە بوی، کە گورزیگ لەورا بویە هوکار کوشیان 80 مەدەنی و زەخمداری 150 کەس.

وتیش: گەڕەکیگ نیشتەجییوین لە سەنعای پایتەخت رووژ یەکشەممە کریا ئامانج، کە بویە هوکار کوشیان 12 مەدەنی و زەخمداری 30 کەس.

وەگورەی بەیاننامەگە، بڕ قوربانیەیل مەدەنی لە ئەنجام گورزەیل ئەمریکا تا ئیسە رەسیەسە 217 کوشیای و436 زەخمدار، فرەیان ژن و مناڵە، وەبی ئەوە کە ئی شمارەیلە ئەندامەیل چەکدار خوەی لەناوی بوود.