تەهران وەڵام مکیس واشینتۆن لە گلەوخواردن ئەرا دانوسەنین دەێد
شەفەق نيوز– تەهران
وەزارەت دەیشت ئیران، ئمڕوو سێشەممە، دووپات کرد کە دیبلۆماسیەت هەر بنەمای سەرەکی ئیمە بویە لە ریڕەوی سیاسی دەرەکی وەڵات، ئەوەیش لە وەڵامدانی لەبان پەیامەیل ئەمریکا لەباوەت ئارەزوویان وە گلەوخواردن ئەرا دانوسەنین.
سەعید خەتیب زادە یاوەر وەزیر دەیشت ئیران، لە قسەیلی ئەرا رووژنامەنویسەیل وت: پەیامەیلیگ لەلایەن ئەمریکا لەی رووژەیل گوزەشتە وەرگردیمن، باس ئارەزوویان وە گلەوخواردن ئەرا مێز دانوسەنین کەن.
خەتیب زادە وتیش: لەناوڕاس دانوسەنین بویمن هەناێ پەلامارمان دریا، و هەمیشە دانوسەنین وەرد ئەوروپیەیل داشتیمن، وەلێ ئەمریکا پەلامار ئەو مێزیشە دا، لە دەسنشانکردن ئەرا پەلامارەیل ئەمریکا وەبان تەهران لە حوزەیران گوزەشتە.
دیاری کرد کە دانوسەنین خوارترین ئاشتیگ لە دڵنیایی خوازێد، و ئەو پەلامار ئاشکرا هیچ جییگ ئەرا دڵنیایی نەهیشت.
لە کۆتایی وتیش: دیبلۆماسیەت هەر بنەمای سەرەکی ئیمە بویە لە ریڕەوی سیاسی دەرەکی ئیران.
ئی قسەیلە دویای ئەوە تیەێد کە ئیسماعیل بەقائی قسەکەر وەزارەت دەیشت ئیران وت: تەهران داوای هیچ دیداریگ وەرد وەرپرسەیلیگ لە ئەمریکا نەکردگە ئەرا دووارەکردن دانوسەنین ئەتۆمی.
وەرجەیە، ستيڤ ويتكۆف، کلکریای دۆناڵد ترەمپ سەرۆک ئەمریکا ئەرا خوەرھەڵات ناوڕاس وت: ئەوەسا لە هەفتەی ئایندە چەوی کەفێدە دیبلۆماسیەیل ئیرانی.
لە وەختیگ مەسعود پزیشکیان سەرۆک ئیران وت: وڵاتەگەی ناڕەزایی نەیرێد لە دووارەکردن دانوسەنین وەرد ئەمریکا، وە مەرج گلەوداین دڵنیایی ناوەین دوو وڵات.
