تەهران: کلکردن سەردانکەرەیل ئەرا عراق وەردەوامە وە هشكايی و هەماهەنگی هەس ئەرا وازکردن فڕۆکەخانەیل و گلەودان خوەنەوارەیل عراقی
شەفەق نیوز- تەهران
ئیران، ئمڕوو شەممە، دووپاتکرد وەبان وەردەوامی کلەوکردن سەردانکەرەیل ئیرانی ئەرا عراق لە ری دەروازەیل هشکانی وەبی گووشدان سڕکردن وەختانە گەشتەیل ئاسمانی، هاو وەخەت وەگەرد تەقەلایەیل وەگەرد بەغدا ئەرا چارەسەرکردن ئاستەنگەیل وەرجەم هاتووچوی زیاتر لە 50 هەزار خوەنەوار عراقی کە لە زانکۆیل ئیران خوەنن.
جێگر کاروباری عەتەبات لە رێکخریاگ حەج و زیارەت ئیرانی، مۆرتەزا ئاقایی، لە لێدوانیگ رووژنامەوانی وت: "وەبی گووشدانە سڕکردن وەختانه گەشتەیل ئاسمانی وە مدوو بەسان هەردوو فڕۆکەخانەی بەغدا و نەجەف لەوەرانوەر کۆمپانیا ئیرانییەیل، ناردن سەردانکەرەیل لە ری دەروازەیل زەمینی (مێهران، خوسرەوی، شەلەمچە، و جەزابە) وەبی وسیان وەپای خشتەی وەختەیل وەردەوامە".
ئاقایی ئاشتکرد گەشتەیل گلەودان وە ری
زەمینی ئەرا سەردانکەرەیل ئامادەی ناو عراق رێکخریاس، وەگەرد دانان دەرفەت ئاڵشتکردن بڕین بلیەت ئاسمانی ئەرا زەمینی و گلەوداین جیاوازی نرخەگەی، و دیاریکرد ئەرا وەردەوامی سلاکاری وەگەرد لایەنەیل پێوەنیدار ئەرا وازەوکردن فڕۆکەخانەی نەجەف لەماوەی رووژەیل کەم ئاینده.
لە ئاست ئەکادیمی، وەزیر زانستەیل ئیرانی، حوسێن سیمایی، لە وەخت دانیشتنی وەگەرد باڵیۆز عراقی لە تەهران یاسر عەبدولزەهرە ئەلحەجاج، ڕاگەیان زیاتر لە 50 هەزار خوەنەوار عراقی ئیسە لە زانکۆیل ئیرانی خوەنن، و دووپاتکرد ئاستەنگەیل هاتووچوی لە ری چارەسەربوین نزیکن ئەرا مسۆگەربوین گلەودانیان ئەرا کورسییەیل خوەنین.
ئی پێشھاتەیلە دویای چەسپانن سزایەیل لەلایەن وەزارەت گەنجینەی ئەمریکی هات کە رەسێدە 27 کۆمپانیای فڕۆکەوانی ئیرانی، کە بویە مدوو ئەوەگ ئیدارەی فڕۆکەخانەی ناودەوڵەتی نەجەف گەشتەیل هاتگ و چگ ئەرا ئیران بوسنێد لە شەوەکی رووژ جومعە (25 سێپتەمبەر/ئەیلوول ئیسە)، لە وەختیگ کە حکومەت عراقی ئمڕوو ئەنجامدان گفتوگوی راستەوخوەی وەگەرد واشنتۆن راگەیان ئەرا وەدەرکردن بڕێگ فڕۆکەخانە لە قەیەغەکردنەگە.
