پەیاکردن دەیان تەرم لەناو خەسەخانەی سوەیدا دویای دەرچگن چەکدارەیل
شەفەق نيوز- دیمەشق
وەزارەت تەندروسی سوریا، ئمڕوو پەنجشەممە، پەیاکردن تەرم دەیان کەس لەناو خەسەخانەی سوەیدا راگەیان، بەشیگیان تەرم ئەندامەیلیگ لە هیزەیل ئەمنی سوریا بوین، ئەوەیش دویای دەرچگن ئەو گرووپەیل چەکدارە کە وەرجەیە لەناو بیناگە بوین.
وەزارەتەگە لە بەیاننامەیگ وت: تەرم دەیان کەس لەناو خەسەخانەی نیشتمانی سوەیدا پەیا کریا، دویای دەرچگن گرووپەیل لەیاسادەرچگ، و دویای ئاشکراکردن تەرمەیل، دەرکەفت هن ئەندامەیلیگ لە هیزەیل ئەمنی و کەسەیلیگ مەدەنیە.
وەرجەیە، وەزارەتەگە خەوەردا لە بەرزەوبوین ئامار قوربانیەیل گورزەیل ئیسرائیل وەبان دیمەشق پایتەخت ئەرا سێ کوشیایگ و 34 زەخمدار.
دویەکە چوارشەممە، فرۆکەوانی ئیسرائیل زنجیرەی گورزەیل سەختیگ وەبان شوینەیلیگ لە سوریا جیوەجی کرد، دیارترینیان بارەگای وەزارەت وەرگری و دەورگردی کۆشک سەرۆکایەتی لە دیمەشق، وە دەسپیچگ مقیەتیکردن تایفەی دورزی لە سوریا.
