شمارەی "دووسەد و پەنجاو و هەفتەم" لە گۆڤار فەیلی

شەفەق نيوز/ لە دەزگای شەفەق ئەرا رووشنهویری و بڵاوکردن، شمارەی (257) نوو لە گۆڤار "فەیلی" ئەرا مانگ ئایار/ مايو 2025 هاتە دەر.
ئی شمارەی نووە بڕیگ باوەت گرنگ لە چین ناوخوەیی و هەرێمی هاناوی.
لە دیارترین باوەتەیل:
* کەرکوک وەرانوەر ئاوینەی خوەی.. نەفت و ناسنامە و میژوو لەبان کاغەز دەنگدان.
وەگەرد نزیکەوبوین مەوقەی هەڵوژاردن پەرلەمانی لە دویادویای 2025، کەرکوک کەفتیەسە وەختیگ سیاسی ناسیای، ئەو شارە کە چەنای چەنیگ باسی وە ئاوینەی ئاڵووزی کردیان، دووارە تیەێدە بان جویر تاقیکردنیگ سەخت ئەرا هاوسەنگی ناسنامەی ز دەسەڵات و نوینەرایەتی، کە لە پارێزگایگ سێ نەتەوەی سەرەکی لەناوی گردەو بوون، کورد، عەرەب، تورکمان، وەگەرد کەمەینەیل ترەک، دیار نییە چشتیگ یەکلاوە بویە، هەرچەن هەڵوژاردن لەشوینیەک و یەکلاییکردن وەختانە بویە.
*لە مزگەفتەو ئارا پەرلەمان.. ئیسلامییەیل لە کوردستان کەفنە بان دوڕیانیگ.
ئی وتارە باس باوەتیگ کەێد کە بزووتنەوەیل ئیسلامی لە هەرێم کوردستان نشانەیلیگ جیاجیا وەخوەیان دوینن، لە وەرەودویاچگن و دەرفەتەیل وەڵاوەبوین، کە هەرچەن
خی کۆمەڵگای کورد ناوەین ئاینداری و نووڕین نەتەوەیی گردەو کەێد، وەلێ پاڵپشتیکردن جەماوەر ئەرا هیزەیل ئیسلامی هەر کەمتر بویە.
* خانمیگ کورد فەیلی نایابی لە "نهێنی ژیان" وەرگرێد
راپۆرتیگ لەبان دویەتیگ هیمان وە تەمەن دە ساڵان نەڕەسیە، هەناێ دەزگایەیل ستەمکاری رژیم وەرین پەلامار ماڵ باوانی دان، و باپیر و داپیری وەگەرد سێ مامەی وەرەو چارەنویس نادیاریگ بردن، کەفتە نوای ژیانیگ پڕ خەبات و رکداری و سەختی، و خوەی نەیادە دەس جویراجویر ئەو رەوشەیلە کەفتنە ریی، تا ئامانجەیل خوەی وەجی بارێد.
* سەعيد ئەفەندی.. خوازێد گیان سینەمای عراقی زنیەو بکەێد، و کێک سەرۆک هەوادارەیلی کیشێد.
لە یەکەمین بەشداریکردن عراق لە ڤیستیواڵ سینەمایی ناودەوڵەتی کان لە فەرەنسا ساڵ 2025، کە هەفتاو هەشتەمین چاپە، لە 13 تا 24 ئایار 2025، خوەڵ لە کاسێت سینەمایی کوینەیگ لاوریەێد کە "سەعيد ئەفەندی"یە ئەرا دەرهێنەر كاميران حوسنی لە بەرهەم ساڵ 1955، و فیلمیگ عراقی خەڵات پەسەنکردن جەماوەر کەفێدە دەسی ، لە بەش (خەڵاتەیل هەفتەی دەرهێنەرەیل)، کە فیلم کێک سەرۆکە ئەرا دەرهێنەر حەسەن هادی، کە ئەوەیش خەڵات کامیرای تەڵایی بویە بەشی.
* بازاڕ ئەستەربادی لە کازمیە.. نشانەیگ میژووی بویەسە کەلاوە.
لە شان مەزارگای کازمەین، لە باکوور بەغداد، روخسار بالکۆنەیلیگ جویر کەلاوە دیار دەێد، لە وەختیگ بازاڕیگ باندریای وەناو "ئەستەربادی" درویژەو بوود، کە وەپی ئویشن "سربادی"، کە لە کویەنترین بازاڕەیل شار کازمیەس، و دامەزریانی چوودەو ئەرا دویادویای سەدەی یانزە.
ئەرا نووڕستن گۆڤارەگە لێرا کلک بنە
لێرایش ئەرا PDF