ههناێ وهرهو ت هاتم، کهلیمه هات!
2025-01-21T13:05:24+00:00
ئێواران وه بێ ت
کۊچهگان بێ دهروهچ گهز کهم!
نیمهڕوان
کتاوهیل سفر ئهتیق،
شهوهگیان
ماڵ باڵابهرزێگ له چوارم هجری
جههان له نوو توان پڕهو بکهن،
له دهیشتهوانهیل ویل «تیسفوون»
له ئهڵوهنێ گ هێمان
له ڕووبارهیل گیانم،
ڕشێده خاک بێخهسرهو
له تاقێ گ بوو «کهسرا» له لێ هات!
له ڕشیانهیل مێژوو
له پهێغهمهریلێ گ
وه گژ دارهیل زاگروسهو تاوه کردن!
...
شهوانه
له ناو لهش خهو
ئهول ئیساگانا،
ئیسگاگان بێ بن زهۊ گهردم
چهمهندهفهر فرهێگ
له ڕووبارهیل خۊنم
پشنمه دهیشتهیل بێ دهیشتهوانا
تهنیا ههناێ وهرهو ت تییهم،
واران وارێ
وا وارێ
کهلیمه وارێ
شێعر وارێ ...
تهنیا ههناێ وهرهو ت تیهم
چهن گهز! تهنیا چهن گهز! دمهو دهم دنیایا!
جهلیل ئاههنگهرنژاد
کوومه شێعر: لهش شهشم
