چەن پارچە شیعریگ
دۊەت ساڵەیل هەوری
گوڵ شەرم دێرێ لە لاد بوود ئەقەر شێوەد شێرینە
هەناێ کوردی قسیە کەی لێود بێشتر ڕەنگینە
لێوەێ باڵاێ ت بۊنە ، مەردم شار شەکەت
سەرنانەسەو بیاوان ئەوانە ک ت دینە
دۊەت ساڵەیل هەوری واکە ئاگر زڵفد
ئاگر گەرمی ژیانە ، ئاگر نیشانەێ ژینە
ئاگر خارەت‌گەرەیل پرچ سزنێد و پەرچەم
تەنیا لە مڵک کوردان ئاگر پرچێ ڕەنگینە
بمین لەێ کرماشانە ، خوەشتر لەێ شارە هاکوو
چۊ کرماشان پێا نیەود شارێ وەێ سەرزەمینە
"مەل ئازادی"
م کەوک سەرمەس بان سەرکەشم
زندان قەفەس کردن وە بەشم
وەهار تووریاێە، لە دەیشت و باخم
تیەنێ نەرمەواێ، سەرد ئێڵاخم
هانە کوو شەوەیل پڕ لە هسارە؟
شنەێ نەرمە واێ دەم ئێوارە
هانە کوو ڕووژەیل پڕ لە ئازادی
پڕ لە گوورانی خوەشی و شادی
هەناێ وەهار هات وە لەنجەو لارە
یاس گرت لە دەروەن، خەم و پەژارە
خوڕەێ وەفراوان لە گووناێ کەورەیل
کۊیەیل بەسانەو، گوڵوەنی ئەورەیل
مەلەیل لە باوش پیرکلوور داران
کشماتۊن لە دەنگ گوورانی واران
م کەوک سەرمەس بان سەرکەشم
زندان قەفەس، کردن وە بەشم
ت ئۊشی وەهار بەساسەو سەروەن؟
چەوان ڕەژییە باێدن وە دەروەن؟
ت ئۊشی مەلان خوەنن لە سەردەن؟
کەڵەیل نووبەن هەسان یا مەردەن؟
خوەزێەو بزانم دووسەیل زۊنە
لە پاێ کام کوچگ، تیرواران بۊنە؟
لە پاێ کام کیەنی بۊنە پەڕپوو؟
لە سینێ کام سان، کریان قەڵ قوو؟
م کەوک سەرمەس بان سەرکەشم
زندان قەفەس کردن وە بەشم
ژیان یانێ ژان، یانێ پەژارە
گیروودەێ درجۊد، لەێ سۊک شارە
ژیان یانێ هۊچ، یانێ بێ بەشی
لەێ بەنیخانە، هاکوو دڵخوەشی؟
چەنی چەن ساڵە، لە گەل بڕیامە
کی ساڕیژ بکەێ، ئێ زۊخ و زامە؟
چەنی چەن ساڵە، هامە پەژارە
دڵم ئەزرەتمەن دەنگ وەهارە
وەهار تن گیان شەونم و شەو بوو
وەو خوەر نازارە لە بان ئاسوو
بڕەسن سڵام مەل دڵڕێشێ
بێکەس، بێ هانا، بێ قەوم خێشێ
وە کۊیە، وە ئاو، وە سەرکەش، وە کەور
وە دەروەن، وە دار، وە واران، وە ئەور
وە ڕووژەیل بەرز بانان شادی
وە چەوەیل کاڵ دۊیەت ئازادی
م کەوک سەرمەس بان سەرکەشم
زندان قەفەس، کردن وە بەشم...
مەسعوود قەنبەری
