مانگەشەو
مانگەشەو رشیاس لە داوان م
یاگەر خوەد نایدە سەر لەشان م!؟
بەو بنیش تاگەر من و مانگەشەو
زڵفە هۊڵەگەد، بچنیمنەو!
ئاهوو لە چەوەیل لێرە لە وەرقەو
ئەتر گوڵباخی وەر داێە لە شەو
گەردەن بلوور لەیل پەری تەن
تیەڵی ئەخمەگەی شیرین تر لە قەن
شیرین شێوەگەێ داوەن گوڵناری
کڕ ڪیشا لە بان مەخش دڵداری!
باوان کیەنی زەوق شێعرەگەم
دارە مەێوەگەێ پێچیایه وەخوەم
هەنای وارێدن واران وە کەم‌کەم
چڕێدەم، بەیدەم وێـلـم کـەیـد لـە "تـەم!"
چروو گواری قەلاجە باوان
فڕەی کەو لە قەو، سووسی لە داوان
لەڕە خەی لە گیان زڵفەیل قنجێ
تام دەڵخوەشی ها لە چاڵ زنجێ!
فڕەی باڵ کەو لە خوەم فەراری
کڕ ڪیشا لەبان مەخش دڵداری!
سروە وەنازەو کۊیەگان چڕێ!
ناوک گوڵەیل گەرمەسێر بڕێ!
دەنگ بنملی لە ڕێیەگەی کیەنی
دڵنگ لە وەر گوڵەگان کەنی!
کڕیوە یەقەێ کۊیه‌گان وڵ کرد
تنگس ئعڵام جمهووری گوڵ کرد
ڕشیا لە گیانم لرقەێ مانگەشەو
ئاشقی لەق دا جوور کیەنی کەو!
کەڵهوڕزایەگەێ لە دۊر دیاری!
کڕ ڪیشا لە بان مەخش دڵداری...
رەزا مەوزوونی
