شنەی وای شەماڵ

شنه‌ی وای شەماڵ، هوونگی باخان

ڕیقەێ راخووز کیەنی ئێڵاخان

قیژەقاژ قاژ، شاقەشاق کاوک

هاژەهاژ وا، ترنگەتانگ ئاو

چاروا وێنەی وا، کوڕەیل قەیقاجی

دۊەتەیل پووشانە سوخمەی ئەقراجی

ڕمەێ ماردەم کوڕەیل تەلار

دە نام ڕەمگەێ کەڵەیل خس قەلار

بڕێ دە کوڕەێل تیرەنازی کەن

بڕ ترەکیش جریت‌وازی کەن

دۊەتەیل دە توو پەردەێ شەرمەوە

نووڕن وەێ جەرخەێ جەم گەرمەوە

وە لەرزەیل پاێ پڕ دە پاونێ

خاتۊنێ پەسا کوورپە لاونێ

ژنەیل تەڕدەس وە شرین تەرزا

گاوس داوەسین وە سێ‌پای بەرزا

زەقەێ کیەر و وەرک، قاڕەی گەل زای

گاوس ژەنیاگ، بایەی ماس مای

ئێڵ هات وە ئێڵاخ، ئەسپاو دانریا

وێنەێ شەنەچیر، ماڵەیل ئەڵدریا

سەرتیل دانەویەک ڕز وەر و پێشت

ماڵەیل ئەڵدریان دە ژێرساێ مانێشت

زاهر سارایی