چوار کوشیان وە تەقەکردن لەناو خەسەخانەیگ لە ئەمریکا
شەفەق نیوز/ پۆلیس ناوچەی تولسا لە ویلایەت ئۆکلاهۆما وت: سێ کەس وەگولە لەناو خەسخانەیگ کوشیان وکەسەیلیگتر زەخمدار بوین، هەنای گەنجیگ نەناسریاگ تەقە لەلیان کرد، ئیجا وە گولەی پۆلیس ئەویش کوشیا، تا شمارەی کوشیانەگە بڕەسێدە چوار کەس.
پۆلیس لە بەیاننامەی کوڵبڕیگ وت: خەوەر ئەرا رەسی ک کابرایگ نەناسریاگ چیە ناو خەسەخانەی سانت فرانسيس وتەقە لە مەردمەگە کەێد.
پۆلیس وتیش: رەسینە شوین رویداوەگە و قوربانیەیل دراوردن و خەسەخانەگە چووڵ کردن، وەگەرد ریکارەیلیگ ئەمنی لەڕخ هەڕەشەیلیگتر.
وەگورەی بەیاننامەیگ فەرمی، ئەندامەیل پۆلیس دیرن هەر ژووریگ لە خەسەخانەگە وەشکنن، وتیش: تەقەکردنەگە بویە هووکار کەفتن بڕیگ زەخمدار.
لەلای خوەییش، جایمی فاولەر ئەندام ئەنجومەن شارەوانی شارەگە لە دیداریگ تەلەڤزیۆنی وت: ئەو کابرا ک تەقەکردیە، خوەییش کوشتیە، وتیش: سێ ریوار بیگوناه کوشیان.
لە واشینتۆن، کۆشک چەرمگ راگەیان ک سەرۆک بایدن لە رویداوەگە ئاگادار کریا، و لەنزیکەو چەودیری ئەو کارە کەێد، وفەرمان وە پێشکەشکردن گشت دەسمیەتییگ ئەرا دەسەڵاتەیل شارەگە دا.
ئی تەقەکردنە، دویای نزیکەی یەک هەفتە لەو کوشتارە تیەێد ک لەناو مەکتەویگ سەرەتایی لە ناوچەی ئۆفاڵدی لە ویلایەت تەکساس بوی، ک ١٩ مناڵ لەناوی کوشیان، وەگەرد دوو خانم مامووستا، ئەوەیش وە گولەی گەنجیگ ١٨ ساڵان.
