نمایشکردن فیلم سینەمایی "نامۆ" له سلێمانی دەسوەپی کەێد
مەنسوور جیهانی ـ نمایش گشتی فیلم سینەمایی "نامۆ" لە دەرهێنان "نادر ساعی وەر" و وە ڕۆڵدوینین ئەکتەر خاوەن ئەزموون کورد "بەختیار پەنجەیی" رووژ دووشه‌مه ٨ ئاب ٢٠٢٢ لە سینەما "سالم" لە شار سلێمانی ده‌سوەپی کەێد.
نمایش گشتی فیلم سینەمایی "نامۆ" (بیگانە) Namo لە دەرهێنان "نادر ساعی وەر"، لە بەرهەمهاوردن هاوبەشی خانم "مەستانە موهاجیر" و "تەهوورا ئەبوالقاسمی" و وە سەرمایەی هاوبەش ئەکتەر ناودار کورد "نەوید محەمەدزادە" و ئەکتەر ناودار سینەمای ئیران "پێژمان بازغی" و وە ڕۆڵدوینین ئەکتەر خاوەن ئەزموون مەهابادی "بەختیار پەنجەیی" و چەن ئەکتەریگتر ناودار، لەوانە: سویل شیرگیر، نادر مێهدی لوو، ناسر هاشمی، هادی ئیفتخارزادە، فیرووز عاقلی و تارا ئاقاجانی؛ ڕۆژی دووشه‌مه ٨ ئاب ٢٠٢٢ لە سینەما "سالم" لە شار سلێمانی پایتەخت روشنهۊری هه‌رێم کوردستان ده‌سوەپی کەێد و هه‌ر وەی بوونە "نادر ساعی وەر" دەرهێنه‌ر و "بەختیار پەنجەیی" ئه‌کته‌ری ئی به‌رهه‌مه پیامیگ تایبه‌ت ئاراسته‌ی لایه‌نگرەیل و هۆگراەیل هونەر سینه‌ما لە هه‌رێم کوردستان کردن.
بەختیار پەنجەیی: یەکیگ له سەرچەوەیل "نامۆ" که‌سایه‌تییگ ڕووناکبیر کوردستانییه.
"بەختیار پەنجەیی" ئه‌کته‌ر کوردی فیلم سینەمایی "نامۆ" له پەیامەگە ئویشێد: "سڵاو و ڕێز، درە به‌خته‌وه‌رم ک وە بوونەی نمایش گشتی فیلمی سینەمایی "نامۆ" له باشوور کوردستان خه‌ریکم وەگەرددان بووم. من ئویشم شایەت "نامۆ" به‌شیگ له سینه‌مای کوردی نەوود، باوجی نمایشکردن ئی فیلمه له هه‌ر شوینیگ کوردستان، وە جویریگ گلەوداینی ئەرا یەکیگ له سەرچەوەیل ئی فیلمه. چوینکە ئی به‌رهه‌مه یەکیگ له سەرچەوەیل که‌سایه‌تی رووشنهویری کابرایگ کوردستانییه. ئومید خوازم ک له نووڕین ئی فیلمه خوەشی وه‌رگرن و ئومید خوازم ک له یەکیگ له سینەمایل چەوم وە دیدار ۆیوە شاد بوود، ررە سپاس."
نادر ساعی وەر: درە به‌خته‌وه‌رم ک فیلم "نامۆ" له کوردستان نمایش کریەێد.
هەرلیوا، "نادر ساعی وەر" دەرهێنه‌ر فیلم سینەمای "نامۆ" له پەیامیگ ئویشێد: "سڵاو، فرە به‌خته‌وه‌رم ک فیلم "نامۆ" له کوردستان نمایش کریەێد. فرە له هه‌ڤاڵەیل له چەن هه‌فته‌ی گوزەشتە تەقەلا و دەسمیەتی فرەیگ دانە، تا ئی فیلمه بڕەسێدە قۆناغ نمایش گشتی لە هه‌رێم کوردستان، ک فرە سپاس گشتیان کەم. فرە خوەشهاڵم ک وە هاوڕیەتی ئێوە فیلمه‌ته لەسەر په‌رده دوینم، و وەیەکەو کەبان فیلمه‌ته وتووێژ و ئاخاوتنی فرە خاس بکه‌یمن. ئومید خوازم ک ئی ئاواته وە زویی بایدە جی. تامه‌جرۆ نووڕتن ئیوەم و فرە سپاس."
"نامۆ" دووهەمین هاوکار سەرمایەی هاوبەش "نەوید محەمەدزادە" و "پێژمان بازغی" دویای فیلم سینەمایی "ناهید" لە دەرهێنانی خاتوو "ئایدا پەناهەندە"س ک ئەرا یەکەمین جار لە شان بەرهەم فیلمسازەیل وەرچەو سینەمای جیهان لە بەش "فڕۆم" Forum لە هەفتامین خول فێستیڤاڵ ناودەوڵەتی فیلمی "بەڕلین" Berlinale لە ئەڵمانیا نمایش کریا.
ئی بەشە تایبەتە وە بەرهەمە سینەمایی، بەڵگەفیلم و ئەزموونییەیل لە سەرتاسەر وە بە زوورهاوردن لەبان دوایین بەرهەم فیلمسازیل فەنج و داهێنەر و لەی ساڵاەیلە ک "بەڕلینالە" وەڕیەو چگ، فیلمسازەیل وەرچەو وە فیلمەیل خوەیان لەی بەشە ئامادە بوین.
نمایش گشتی فیلم سینەمایی "نامۆ" وە هاوکاری وەزارەت روشنهۊری و گەنجەیل حکومەت هەرێم کوردستان و کۆمپانیای ئەڵمانی "ئاڕت هوود ئینتێرتەیمێنت" ArtHood Entertainment بڵاوکەر ناودەوڵەتی ئی فیلمە لە سینەمای شارەیل جویراجویر هەرێم کوردستان نشان دریەێد.
ئی بەرهەم سینەماییە لە درویژی بەشدارییە ناودەوڵەتیەیل خوەی لە بڕیگ فێستیڤاڵ جەهانی بەشداری کردیە، لەوانە: شەس و شەشەمین خول فێستیڤاڵ ناودەوڵەتی فیلم "تائۆرمینا" Taormina لە وڵات ئیتالیا، چل و چوارەمین خول فێستیڤاڵ ناودەوڵەتی فیلم "هۆنگ کۆنگ" Hong Kong، فێستیڤاڵ ناودەوڵەتی دووساڵانەی "فڕانکفۆڕت" لە وڵات ئەڵمانیا، دەهەمین خول فێستیڤاڵی ناودەوڵەتی فیلم "تاوان و دەردیسەر"ی Crime and Punishment ئەستەنبووڵ لە وڵات تورکیا و هەرلیوا چەن رویداویگ هونەریتر.
ئی بەرهەم سینەماییە خەڵات خاسترین فیلم لە دەهەمین خول فێستیڤاڵی ناودەوڵەتی فیلم "تاوان و دەدیسەر" ئەستەنبووڵ، خەڵات خاسترین فیلم لە دەهەمین خول فێستیڤاڵی ناودەوڵەتی فیلم "بیجینگ" Beijing لە وڵات چین و هەرلیوا "بەختیار پەنجەیی" ئەرا ڕۆڵدوینین لەی فیلمە خەڵات خاسترین ئەکتەر پیاو لە شەس و شەشەمین خول فێستیڤاڵی ناودەوڵەتی فیلم "تائۆرمینا" لە وڵات ئیتالیا و هەرلیوا خەڵات خاسترین ئەکتەر پیاو لە چل و چوارەمین خول فێستیڤاڵی ناودەوڵەتی فیلم "هۆنگ کۆنگ" وەدەس هاوردیە.
