نێچیروان بارزانی ئەرا ئەڵمانیا: داعش هیمان هەڕەشەس لەبان ئەوروپا و خوەرهەڵات ناوڕاس
شەفەق نیوز/ نێچیروان بارزانی سەرۆک هەرێم کوردستان وەگەرد کریستینیا لامبریشت خانمە وەزیر وەرگری ئەڵمانیا، لە گردەوبۊنیان لە هەولێر، ئمڕوو یەکشەممە، رێککەفتن ک تا ئیسە جەنگ داعش تەواو نەۊیە، و مەترسیەیل تیرۆر لەناوچەگە مەترسی و هەڕەشەس لەبان ئاسایش و ئارامی لە ئەوروپا و خوەرهەڵات ناوڕاس.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە گردەوبۊنەگە باس پەیوەندیەیل ناوبەین ئەڵمانیا و عراق و هەرێم کوردستان و دۊیاترین گەشەیلە لە نواگردن تیرۆر و مەترسیەیل داعش کریا، و هەمیش دووارە نووڕستن لە ئەرکەیل هێزەیل ئەڵمانیا لە عراق و رەوشەیل ناوچەگە وەشیوەی گشتی.
بەیاننامەگە وتیش: بارزانی باس لە پیرووزبایی خوەی ئەرا وەرگردن لامبریشت و حکومەت نوو ئەڵمانیا ئەرا ئەرکەیل خوەیان کرد، باس سەردانەگەی لەی وەختە وەگرنگ کرد، و هەمیش سپاس لە سوپای ئەڵمانیا کرد ئەرا پاڵپشتیکردن عراق و هەرێم کوردستان لە جەنگ دژوە تیرۆر کرد، و دووپات کرد ک هەڕەشەیل داعش هیمان تەواو نەۊیە و لەناوبردن تیرۆر تەنیا وەڕی سەربازی بێکریەێد، باوجی گامەیل سیاسییش خوازێد.
بارزانی سوپاس لە گەل و حکومەت و پەرلەمان ئەڵمانیا کرد، و هەمیش سوپاس لە دەور و ئامادەیی ئەڵمانیا لە عراق و هەرێم کوردستان کرد ئەرا پاڵپشتیکردن سیاسی و سەربازی و مرۆیی و دەسمیەتیەیل و ئەوزەڵکردن، وەتایبەت لە هاوکاریەیل مرۆیی ئەرا قوربانیەیل جەنگەگە لەناو ئیزیدی و مەسیحیەیلە.
بەیاننامەگە وتیش: لامبریشت وەگەرد نووەکردن دووپاتی لەبان وەردەوامی لە پاڵپشتیکردن ئەڵمانیا ئەرا عراق و هەرێم کوردستان، باس لە گەشبینی خوەی کرد ئەرا ئایندەی کار هاوبەش وەگەرد عراق و هەرێم کوردستان، و باس لە سوپاس ئەڵمانیا ئەرا دەور و قوربانیەیل هێزەیل پێشمەرگە لەنواگردن و شکستهاوردن داعش کرد.
رەوش ئاوارە و پەنابەرەیل لە هەرێم کوردستان، و جۊلەیل داعش لە سوریا و رەوش کامپ هۆل، و بڕێ لە باوەتەیلیگ خاوەن گرنگی دوو لایەنەگە باسەیل ناو ئەو گردەوبۊنە بۊین.
