نێچیروان بارزانی ئەرا ساکو: هەرێم کوردستان هەمیشە جوور پەنای ئارامیگ ئەرا گشت پێکهاتەیل مینێد
شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، چەوی کەفتە کاردیناڵ لویس ساکو، بترێرک کلیسەی کلدانی لە عراق و جهان، وەگەرد شاند یاوەری.
سەروکایەتی هەرێم لە بەیاننامەیگ رەسیە ئاژانس شەفەق نیوز وت: لە چەوپیکەفتنەگە باس رەوش عراق و هەرێم کوردستان، و رەوش ئاوارە مەسیحیەیلەی هەرێم کریا، و هەمیش رووشنایی خریا بان هاوکاری نەینەوا، و مەسیحیەیل شار مووسڵ و ناوچەگە.
بەیاننامەگە وتیش؛ هەردوگ لایەنەگە رێک کەفتن لە گرنکی وەجیهاوردن دڵنیایی و بڕوایەی تا ئاوارە مەسیحیەیلە بتوێنن وەرەو میلیکانیان گلەو بخوەن، و دەسکردن وە هاوردنەوەی ژیان ئاوەدانکردنەوەی ئەو ناوچەیلە ک لەوەر پەلامارەیل ریخریاگ داعش زیان وەخوەیان دین، و پاڵپشتی و دەسمیەتی ناودەوڵەتی خوازن.
کاردیناڵ ساکو دەسخوەشی لە پێکەوەژیان و ئەوەکە قبوڵکردن و ئاوەدانکردنەوە و ئەوزەڵکردن کرد، و ئەو دەورە ک سەرۆکایەتی هەرێم کوردستان لەی چوارچێوە رانێدەی، و دووپات کرد ک ناسنامەی کوردستانی گەورە و گشتکیرە ئەرا گشت باوەڕ و بنچینەیل، و پەنابەرەیل مەسیحی لە وڵاوەرل جهان توانای گلەوخواردن وەرەو هەرێم کوردستان دیرن و وەئاشتی و ئاسودەیی لەناوی گوزەران بکەن، و بەشدار بوون لە گەشەکردن و ئەوزەڵکردن و ئاوەدانکردنەوەی.
لەلای خوەییش، سەرۆک نێچیروان بارزانی دووارە دووپات کرد ک هەرێم کوردستان شانازی وە کەلتوور پێکەوەژیان و خوەشەویستی کەێد، و هەمیشە و جاران جوور پەنای ئارامیگ ئەرا گشت پێکهاتەیلە مینێد.
هەردوگ لایەنەگە باس سەردانەگەی پاپای ڤاتیکان ئەرا عراق و هەرێم کوردستان وە گرنگ کردن، و دەور گرنگیگ لە قویلەوکردن کەلتوور پێکەوەژیان و ئەوەکە قبوڵکردن داشت.
