سەۆک هەرێم کوردستان نیگەرانە لە ئامارەیل تونوتیژی و کوشتن و دەسدرۊژی لەبان ماف ژن
شەفەق نیوز/ نێچیروان بارزانی سەرۆک هەرێم کوردستان، ئمڕوو سێشەممە، باس لە نیگەرانی خوەی کرد وەرانوەر ئەو ئامارەیلە ک لە تونوتیژی و کوشتن و شکەنجە و دەسدرۊژی لەبان ماف ژن لە هەرێم کوردستان توومار کریەێد، و جەخت کرد ک ئی کارە وە گشت شیوەیلی قبوول نییە، و داوا لە دامەزاروەیل فەرمی لە هەرێم کوردستان کرد هاوکاری و هەماهەنگی لەناوبەینیان بکەن، تا سیمای تونوتیژی لەبان ژن نەمینێد.
سەرۆک هەرێم لە بەیاننامیگ ئمڕوو پیروزبایی لە ژنەیل کوردستان و جەهان وە بوونەی رووژ جەهانی ژن کرد.
سەرۆک بارزانی لە بەیاننامی پیروزبایی وت:
پیروزبایی یاد هەشت ئادار، رووژ جەهانی ژن، لە گشت ژنەیل کوردستان لەناو خاک نیشتمان و لە هەر شۊنیگ لە جەهان وەگەرمترین پیروزبایی کەم، داوای وەردەوامی پێشکەفتن و سەرکەفتن ئەرایان کەم.
لەی ساڵیادە، وەگەرد دووپاتکردن لە پاڵپشتی گشتیمان ئەرا ژنەیل کوردستان، دڵنیایان کەیمن ک ئیمە جۊر ئەوەگ هەمیشە بۊیمنە، وەرگری لە ماف و ئازادییان کەیمن، و وەگشت هازمان مقەیەتییان کەیمن.
لەی مەوقەگ ئی ساڵیادە کەیمنە دی، وە نیگەرانی نووڕیمنە ئامارەیل تونوتیژی و کوشتن و زیاندان ژن و دەسدرۊژی لەبان مافی، ئەو کارە ک وەخراوی هاتە بان رەوشەیل کۆمەڵایەتی و ناو هەرێم کوردستان، جەخت کەیمن ک ئی رەوشە قەت قەبوول نەکریاگە، و بایەتە وەیەکجاری کۆتایی وەپی باێد.
ک دژایەتی توندوتیژی و نواگردن کوشتن ژن وەهەر دەسپچگ و بەهانەیگ، ئەرکیگ هاوبەشە لەبان سێ سەرۆکایەتیەیل هەرێم کوردستان و لایەنەیل پەێوەندیدار حکومەتی و ریخریاگەیل و پیاوەیل ئاینی و راگەیانن و گشت کۆمەڵگا.
و بایەتە گشتمان وەڕی پەروەردە و هوشیارکردن تاک و خیزان هاوکار بۊمن، و کار وەڕاسی ئەرا کۆتاییهاوردن و لەناوبردن تونوتیژی لەبان ژن بکەیمن، و کەلتوور ناتونوتیژی و خوەشبۊن و یەکسانی بتەو بکەیمن، و مسۆگەر هاوبەشی و بەشداری گورج ئەرا ژن لە گشت هۊردە و شۊنەیل ژیان و دەسەڵات و سیاسەت و ئیدارە بکەیمن، تا توانایلی ئەوزەڵ بوود.
سەربەرزی ئەرا ساڵیاد هەشت ئادار، سەرکەفتن ئەرا زەحمەتکیشان و خەبات ژن و ئازادیخوازەیل ئەرا وەدەسهاوردن مافەیل و داد و یەکسانی، سڵاو ئەرا گیان قوربانیەیل تونوتیژی لەبان ژن.
نێچیروان بارزانی
سەرۆک هەرێم کوردستان
٨ ئادار ٢٠٢٢
