نوینەرەیل دیالە ڕازی وە وەڕیەوبەر نوو پەروەردە نیین
شەفەق نیوز/ شمارەیگ لە نوینەرەیل دیالە، ئمڕوو چوارشەممە، ئاشکرای ناڕەزاییان لە ئەرکدارکردن وەڕیەوبەر نوویگ ئەرا پەروەردەی دیالە، دویر لە میکانزم سڵاکردن و هویردنووڕین.
نەورەس ئەلعێسا خانمە نەینەر لە دیالە ئەرا ئاژانس شەفەق نیوز وت: پەرلەمانتارەیل دیالە وە واژوو فەرمی ئاشکرای ناڕەزاییان لە ئەرکدارکردن قاسم جبوری ئەرا وەڕیەوبەر پەروەردەی دیالە کردن لەجیای جەعفەر زەرگووش وەڕیەوبەر وەرینی.
دیاری کرد داناین قاسم جبوری لەلایەن وەزارەت پەروەردە دویای دەسوەردان یەکیگ لە پەرلەمانتارەیل پارێگاگە هاتیە وەبی سڵاکردن ئەو نوینەرەیل گەل لە پەرلەماتارەیل دیالە، وەبی قسەکردن وەرد لایەنەیل چەودیریکردن ئەرا دڵنیابوین لە بیگوناهی وەڕیەوبەر نوو پەروەردە لە هەر باوەتەیگ گەندەڵی.
نەورەس خان دووپات کرد ک ئاڵشتکردن وەڕیەوبەرەیل فەرمانگەیل پارێزگای دیالە بایەتە بکەفێدە ژیر ریکار وبنەمایل پیشەیی ئاشکرا و هویرد، دویر لە بەرژەوەنی کەس یا هووز.
وەرجەیە، وەزارەت پەروەردە فەرمان فەرمی وە ئەرکدارکردن قاسم جبوری ئەرا پۆست وەڕیەوبەر پەروەردەی دیالە دەرکرد، و جەعفەر زەرگووش وەڕیەوبەر وەرینی خستە پۆست وەڕیەوبەر پەروەردەی کەرخ سێیەم.
