ژن وشوییگ لە نەجەف ژنیگ پارچە پارچە کەن و سزننەی

شەفەق نیوز/ سەرچەوەیگ ئەمنی، ئمڕوو چوارشەممە، خەوەردا ک ژنیگ لە تەمەن ٤٠ ساڵان، لەناو ماڵەگەی لە گەڕەک جەزیرە باکوور پارێزگای نەجەف وەکوشیای پەیا کریا.

سەرچەوەگە ئەرا ئاژانس شەفەق نیوز وت: ژن وشوییگ ژنەگە هاوردنەسە ماڵ خوەیان، ئیجا کوشتنەسەی، و ئیجا کوتکوتی کردنە، وتەرمەگەی وە "پریمز" لەناو تەنویریگ لەبان خانیەگە سزاننە، و پارچەیل لەش ئەو ژنە خستنەسە ناو گونیەی ئارد، و نانەسەی ناو کاوەنتەر، بیجگە سەرەگەی ک هیمان دیار نییە، وتیش؛ شوی ئەو ژن قوربانیە، ئاگادار لایەنەیل ئەمنی کردیە ک ژنەگەی دووگیان بویە.

سەرچەوەگە وتیش: کەسوکارەیل ژنە قوربانیەگە دویای زەوەر تاوانەگە، گولەواران ماڵ ژن وشویەگە کردنە، دویای ئەوە ک گشتیان لەماڵەگە واینە.