یە سێ مانگە مووچە نەوردنە.. مردن ٣ کریکار پاکەوکردن لە خانەقین
شەفەق نیوز/ سەرچەوەیگ ئاگادار لە شار خانەقین، ئمڕوو دووشەممە، خەوەردا لە مردن ٣ کریکار پاکەوکردن وەماوەی ٤٨ سەعات گوزەشتە، لە وەختیگ ک باوگیگ لە بەعقوبە کوڕ خوەی لە خوەیکوشتن رزگار کرد.
سەرچەوەگە ئەرا ئاژانس شەفەق نیوز وت: یەکیگ لە کراکارەیل پاکەوکردن لەلای شارەوانی خانقين- هەرێم کوردستان، مەوقەی کارکردنی، وەبی زانستن هووکارەیل، گیانی لەدەسدا، ودیاری کرد ک وە ماوەی ٤٨ سەعات گوزەشتە، یە سێیەم کریکار پاکەوکردنە لە خانەقین بمرێد.
سەرچەوەگە دیاری کرد ک ئەو سێ کریکارە یە ماوەی سێ مانگە مووچە نەگردنە، هەکاتی گشت کریکارەیل شارەوانی.
کریکارەیل شارەوانی، وهەمیش فرەی فەرمانبەرەیل کوردستان زیان لە دیرهاتن مووچەی مانگانە وەخوەیان دوینن. لە دیالە، سەرچەوەیگ ئەمنی خەوەردا لە شکستهاوردن وە تەقەلای خوەیکوشتن گەنجیگ لە شار بەعقوبە.
سەرچەوەگە ئەرا ئاژانس شەفەق نیوز وت: پیاویگ توەنست نەیلێد کوڕەگەی خوەی بەێدە سێدارە لەناو ماڵەگەی لە ناوچەی منجەرە لە ناوڕاس بەعقوبە، و لە دویاترین دەرفەت توەنست رزگاری بکەێد.
وتیش: ئیرنگە گەنجەگە لە خەسخانەی بەعقوبە لەژیر چەودیری هویرد خەفتیە، و لەوەر گرفتەیلیگ دەروینی وژیانی ئەو تەقەلای خوەیکوشتنە دایە.
