دویەم جویر لەی رویداوە لە دیالە...دویەتە خوەنەواریگ لە دیالە خوەی کوشێد
2022-06-10T09:21:08+00:00
شەفەق نیوز/ سەرچەوەیگ ئەمنی، ئمڕوو جومعە، خەوەردا لە خوەیکوشتن دویەتیگ لەناو ماڵ خوەیان لە دەوروبەر بەعقوبە، و یە دویەم رویداوە لە ماوەی چەن ساعاتیگ لە پارێزگای دیالە.
وەرجەیە، کوریگ گەنج لەوەر دەرنەچین لە وانەیلی ئمڕوو خوەی کوشت لە دەوروبەر ناحیەی جەلەولا باکوور خوەرهەڵات دیالە.
سەرچەوەگە وە ئاژانس شەفەق نیوز وت، دویەتە خوەنەواریگ لە داڵگبوی 2005 خوەی کوشتیە لە ری هەڵواسین خوەی لە ناو ماڵ لە ناوچەی (دور زراعیە) لە باکوور خوەرئاوای شار بەعقوبە تا ئیسە هووکارەگەی نادیارە.
وتیش؛ تەرم قوربانیەگە ئەرا پزیشگ دادوەری کلکریایە و دەسڵاتدارەیل ئەمنی لێکۆڵینەوە لە رویداوەگە وازکردنە.
