دیالە.. گلەوخواردن کارەبا ئەرا دوو ناوچەی سنووری دویای زیاتر لە ٢٤ ساعەت بڕیان
شەفەق نیوز/ وەرپرسیگ ناوخوەیی لە دیالە، ئمڕوو شەممە، گلەوخواردن کارەبا ئەرا ناحیەیل سنووری مەنەلی و قەزانیە راگەیان، دویای بڕیانی ئەرا زیاتر لە ٢٤ ساعەت لە ئەنجام وارانە رفتەیل.
حەیدەر ستار ئەندام ئەنجومەن وەرین مەنەلی ئەرا ئاژانس شەفەق نیوز وت: کادر و مەفرەزەیل کارەبای دیالە توەنستن کارەبا ئەرا ناوچەیل مەنەلی و قەزانیە گلەو بیەن، دویای زیاتر لە ٢٤ ساعەت لە بڕیانی لە ئەنجام وارانەگە، و خاسەوکردن گیچەڵەگەی.
هەرلیوا، چالاکوان مەدەنی عومەر عادل ئەرا ئاژانس شەفەق نیوز وت: واران و بەڵاچەگەی دویەکە تەڵەیل کارەبای ٣٣ کەی ڤی لە دە پایەی کارەبا خست، ک کارەبا وە تەواوی لە مەنەلی و قەزانیە بڕێد.
عادل باس کرد ک ئەو پڕۆژەی تووڕ کارەباییە ک لەی دویاییە ئەرا ناحیەیل مەنەلی و قەزانیە دروس کریانە سەرکەفتگ نییە و لەهەر مەوقەیگ کەفێدە وەر رمیان، لە ئەنجام رەوشەیل سرووشتی جیاجیا، و داوای دووارە خاسکردن پرۆژەگە کرد، و چارەکردن ئەو گیچەڵ گەورە ئەرا مسۆگەرکردن وەردەوامی رەسین کارەبا ئەرا قەزانیە و مەنەلی.
