چالاکوانەیل خانەقین دەسکەنە هەڵمەت ئۆکسجین ئەرا بیمارەیل کۆڕۆنا
شەفەق نیوز/ بڕیاریگ حکومەتی وە قەیەغەکردن هاوردەی بوتڵ ئۆکسجین لەەوڵاتەیل هاوسا، قەيرانیگ لە گاز دروس کرد وەتایبەت لە خەسەخانەی خانەقین، ک هیشت چالاکوانەیل شارەگە وە هەماهەنگی وەگەرد خەسەخانەگە و ئیدارەی قەزاگە دەس وە هەڵمەت دابینکردن ئۆکسجین بکەن تا لەی قەیرانە رەد بوون.
سەڵاح وەندی چالاکوان شارستانی لە خانەقین، ئەرا ئاژانس شەفەق نیوز وت: ئۆکسجینەگە بویە هووکار قەیران و کەمی لە گاز لە شار خانەقین، ک هیشت وە هەماهەنگی وداواکاری لە خەسەخانەی خانەقین، دەس وە هەڵمەتیگ ئەرا فریاکەفتن خەسەخانەگە وە بوتڵەیل ئۆکسجین جیوەجی بکەیمن.
وەندی وتیش؛ ٥٠ بوتڵ ئۆکسجین وە رەنج شان چالاکوانەیل خانەقین ئەرا هۆڵەیل کەرەنتین و بیمارەیل کۆڕۆنا وەبی هیچ پاڵپشتییگ حکومەتی یا حزبی دابین کریا، دویای پەککەفتن حکومەتەگە لە دابینکردن بوتڵەیل ئۆکسجین ئەرا بیمارەیل، ئەوەیش وەپشتبەسان وە کار هەرەوەزی.
لەوەر ئی قەیرانە، چالاکوانەیل خانەقین دەسەیگ سێیانی لە چالاکوانەیل و ئیدارەی خەسەخانەگە و قەزاگە دروس کردن تا ئۆکسجین دابین بکەن، و شوین وەبیماریەیل کۆڕۆنا لە هوڵەیل کەرەنتین ئاڵشت بکەن وەرەو کەرت تەندروسی، ئەوەیش لە بنەمای رینمایل تەندروسی دیالە.
