گەنجیگ چینی ئەرا ٤ دۆلار ١٤ ساڵ لەناو ئەشکەفتیگ خوەی شارێدەو
میدیایل راگەیانن چینی وتن: "ليو موفو" هەنای لە ساڵ ٢٠٠٩ ئەو دزیکردنە جیوەجی کرد، تەمەنی لەناوڕاس سیەیل بوی.
و دویای دزیکردنەگە، دوو کەستر وەگەردی لە دزیەگە هاوبەش بوینە، خواردن سەننە، و ئەو پویلەگە لەناو خوەیان بەشەو کردنە، ک هەر یەکیگیان تەنیا ٤ دۆلار کەفتە بەشی.
دویای چەن رووژیگ لە دزیەگە، پولیس ئەو دوو کەسەگە دەسگیر کرد، و "موفو" لە رخ پولیس خوەی شاردەو.
"موفو" پەنای ئارامیگ ئەرا خوەی پەیا نەکرد، تا ناچار بوی بچوودە دارسان دویریگ، و ساڵەیل گەنجی خوەی لەناو ئەشکەفتیگ لەناو رخ و نیگەرانی تەواو بکەێد، و لەو دارەیلە خواردن خوەی پەیا کەێد، و بڕیگ سەگ وەرەلا لەو ناوە کردە خاوەن، تا لە ئاژەڵەیل مقیەتیی بکەن.
سەرچەوەیل وتن: "موفو" لە جەژنەیل وەدزیەو هاتیادە ئاوایەگەی و ئەرا چەن خولەکیگ خیزانەگەی کردیادە سەر، و کەمیگ خواردن لەلیان بردیاد.
ئەو کار و کردەوە نەیشت "موفو" بکەفێدە شوین تەرم باوگی، و نەیش باێدە ناو سویر کوڕەگەی، و تا ئیسە چەوی لە کوڕەزاگەی نەکفتیە.
لە کانوون دویەم گوزەشتە، "موفو" ک ئمڕوو تەمەنی رەسیە ٥٠ ساڵ، بڕیار دا خوەی بەێدە دەس پولیس، بەشکی باێدە ناو خیزانەگەی.
وەلێ ئەو تاوانە لەلای دادگای چین کوینەو نەویە، ک ئیرنگە کەفتیەسە وەر فەرمان ٣ تا ١٠ ساڵ زیندانیکردن.
