گەنجیگ دویای 17 ساڵ خواردن جیاوازیگ تاقیکردەو
2023-11-01T11:31:35+00:00
شەفەق نیوز/ گەنجیگ بەریتانی چەن ساڵيگە ئالوودەی یەک جویر خواردن بویە، لەهەمان وەخت تویش گیچەڵ تەندروسی هاتیە.
ماڵپەڕ "METRO" باس لە گەنجیگ کردیە وە ناو "رایان هاوارت"، خەڵک شار ئەندۆڤەر ویلایەت هامپشایرە، ماوەی ١٧ ساڵە بیجگە لە مامر، و پەتاتە و مەعکەرۆنی هویچ چشتیگتر نەخواردیە.
رایان تەمەن ٢١ ساڵە و لەوەر تویشهاتن وە دۆخیگ تایبەت لە تەمەن چوار ساڵیەو وە هویچ جویریگ ئەزرەتی ئەرا خوەراکەیلتر نەمەنییە، داڵگ و باوگی لەو ماوە تەقەلای فرەیگ وەگەردی دانە تا سیستەم خواردنی ئاڵشت بکەێد باوجی گشت تەقەلایەیلیان بی ئەنجام بوینە.
ئەو خوەراکەیلە کەمترین ویتامین و کانزا و مادەی خوەراکی وە لەشی بەخشیە، وەی مدوو تویش چەندین گرفت تەندروسی بویە.
ئەو گەنجە ماویگ وەرجە ئیسە کەسیگ ناسیە کە توەنستیە چارەسەر بارودۆخەگەی بکەێد وە خواردن قاویگ سەوزەی جویراوجویر دەسوەپی کردیە دویای ئەوەیش دەسکردیە وە خواردن میوەیل جویراوجویر.
